Լրացված իրականություն՝ Microsoft-ի կողմից
Microsoft ընկերությունն արտոնագրել է, այսպես կոչված, լրացված իրականության ակնոցների սեփական տարբերակը։ Այլ ընկերություններ ևս աշխատում են նման նախագծերի վրա և միաժամանակ պատրաստվում արտոնագրային պատերազմի։
Microsoft-ի նորամուծության ամբողջական անվանումն է՝ «Տեղի ունեցողի վերաբերալ լրացուցիչ տեղեկատվության տրամադրում իրական ժամանակում»։ Օրինակ, եթե օգտագործողն այդ ակնոցներով մարզադաշտում ֆուտբոլ է դիտում, ապա կոնկրետ ֆուտբոլիստին նայելիս՝ տեսնում է նրա մասին տարբեր տեղեկություններ՝ անունը, տարիքը, խփած գոլերի քանակը և այլն։
Այն նման է սխեմային, որի վրա ներկայումս աշխատում է նաև Google-ը։ Google-ը խոստանում է արդեն 2014թ. թողարկել իր ակնոցները, որոնցքցույց կտան ճիշտ ճանապարհը, օնլայն ռեժիմում օտար լեզվից կթարգմանեն վահանակներն ու ցուցանակները, կապ կապահովեն աշխարհի տարբեր ծայրերում գտնվող հարազատների հետ, կհուշեն ճանապարհային խցանումների մասին, և այլն։
Sony ընկերությունը նույնպես մշակում է ակնոցների իր սեփական տարբերակը։ Գործառույթներով այն նման կլինի վերը նշվածին։ Սակայն կունենա ևս մի հնարավորություն՝ ակնոցից ակնոց փոխանցել տվյալները։ Դրա համար ակնոց կրողը պետք է պարզապես աչքով անի նրան, ում ցանկանում է փոխանցել իր կոնտակտները։
Apple-ը նույնպես անմասն չի այս ծրագրերից։ Նման մի նորամուծություն ընկերությունն արտոնագրել է դեռևս 2006թ., սակայն չի շտապում բացել խաղաքարտերը։ Apple-ը շարժվում է հին ու փորձված մարտավարությամբ՝ հարգալից կերպով առաջ թողնել մրցակիցներին, տեսնել նրանց լուծումներն ու շուկայի արձագանքը, որից հետո նոր միայն թողարկել սեփականը՝ դրանում համատեղելով ամենահաջող գաղափարները։
