Ավագ դպրոցներում պետք է հոգեբաններ աշխատեն
Հոգեբանական խնդիրներ ունենալիս մարդիկ հաճախ մասնագետի չեն դիմում: Այս կարծիքին է ԵՊԲՀ բժշկական հոգեբանության ամբիոնի վարիչ, INTRA հոգեբանական կենտրոնի հոգեբան Խաչատուր Գասպարյանը:
«Եթե մարդկանց մոտ առաջանան խնդիրներ՝ կապված, օրինակ, սրտանոթային համակարգի հետ, նրանք կդիմեն համապատասխան մասնագետի, բայց հոգեբանական խնդիրներ ունենալու դեպքում նրանք հաճախ չեն դիմում մասնագետի»,- ասում է Խաչատուր Գասպարյանը:
Ըստ նրա՝ մարդկանց հաճախ թվում է, որ նրանք իրենց հոգեբանական խնդիրները կարող են ինքնուրույն հաղթահարել: Հոգեբանը նշում է, որ թեթև խնդիրները մարդիկ, իրոք, ինքնուրույն ի վիճակի են հաղթահարել, սակայն բարդ դեպքերում առանց հոգեբանի օգնության այդ խնդիրները կարգավորել հնարավոր չէ:
Խ. Գասպարյանի կարծիքով՝ ավագ դպրոցներում պետք է աշխատեն նաև հոգեբաններ: «Եթե հոգեբաններ աշխատեն ուսուցիչների, ծնողների, աշակերտների հետ, շատ ավելի հեշտ կլինի կանխել այն բոլոր խնդիրները, որոնք պատահում են ավագ դպրոցում: Կարևոր է, որ նրանք բոլորն էլ իրազեկված լինեն`որոնք են հոգեբանական խնդիրների նախանշանները, և կարողանան կանխել դրանք»:
