Սիրիայի հարցով նոր հատուկ պատվիրակը Դամասկոս կայցելի սեպտեմբերի սկզբներին
Սիրիայի հարցով ՄԱԿ-ի և Արաբական երկրների լիգայի (ԱԵԼ) նոր հատուկ պատվիրակ Լահդար Բրահիմին մտադիր է սեպտեմբերի առաջին կեսին Դամասկոս այցելել, հայտնում է AFP գործակալությունը:
Բացի այդ, Բրահիմին գալիք շաբաթ Նյու Յորքում հանդիպում կունենա նախկին բանագնաց Քոֆի Անանի և ՄԱԿ-ի գլխավոր քարտուղար Բան Կի-մունի հետ, ինչի մասին հայտարարել է նրա խոսնակ Ահմադ Ֆավզին:
«Բրահիմին մտադիր է Սիրիա այցելել: Ըստ ամենայնի, դա տեղի կունենա մինչ ՄԱԿ-ի գլխավոր ասամբլեայի սեպտեմբերի 24-ին կայանալիք նիստը»,-նշել է Ֆավզին:
Սիրիայի հարցով հատուկ պատվիրակը Նյու Յորքում է` ՄԱԿ-ի Անվտանգության խորհրդի բարձրաստիճան դիվանագետների հետ բանակցությունների նպատակով:
Բրահիմին օգնություն է խնդրել ՄԱԿ-ի ԱԽ-ից, սակայն չի ներկայացրել որևէ ծրագիր, որն ի զորու կլիներ վերջ տալ 17 ամսից ավելի տևող սիրիական հակամարտությանը:
Բրահիմին իր լիազորությունները պաշտոնապես կստանձնի սեպտեմբերի 1-ին:
