Ֆրանսիայում գործազրկությունը հասել է ռեկորդային մակարդակի
Երկրի աշխատանքի նախարարության տվյալների համաձայն, գործազրկության մակարդակը ռեկորդային ցուցանիշի է հասել վերջին 13 տարվա կտրվածքով։
Հուլիս ամսին Ֆրանսիայում գործազուրկների թիվը հասել է 2 միլիոն 987 հազար մարդու։ Դա 8 տոկոսով գերազանցում է նախորդ տարվա ցուցանիշը։ Միայն հուլիս ամսվա ընթացքում գործազուրկների բանակը համալրվել է 41 հազար հոգով։
Ամսական կտրվածքով գործազրկության այդպիսի աճ երկիրը չէր տեսել 2008թ. ճգնաժամից ի վեր։ Եթե գործազուրկների թվի մեջ ներառվեն նաև այն մարդիկ, ովքեր աշխատում են ոչ լրիվ դրույքով և լիարժեք աշխատանք են փնտրում, ապա աշխատանք չունեցող մարդկանց թիվը կհասնի 4.5 միլիոնի։
Ընդ որում, առաջիկայում այս թիվը կարող է աճել, քանի որ Peugeot և Carrefour ընկերությունները պատրասվում են մեծ թվով աշխատատեղեր կրճատել։ Որպես պատասխան միջոց՝ Ֆրանսիայի կառավարությունն այս շաբաթ ներկայացնելու է մի նախագիծ, որի արդյունքում պետք է ստեղծվեն շուրջ 150 հազար նոր աշխատատեղեր։
