Ֆրանսիական «Պերնո Ռիկար» ընկերության նախագահը մահացել է
Ֆրանսիայի «Սաինթ Անն» հիվանդանոցում 67 տարեկան հասակում օգոստոսի 17-ին մահացել է ալկոհոլային խմիչքներ արտադրող աշխարհի խոշորագույն «Պերնո Ռիկար» ընկերության նախագահ Պատրիկ Ռիկարը, հայտնում է «Ֆրանս պրես» գործակալությունը:
Ըստ գործակալության` նա հիվանդանոց էր տեղափոխվել օգոստոսի 16-ին, սրտամկանի ինֆարկտի կասկածով:
«Ընտանիքը, տնօրենների խորհուրդն ու ղեկավարությունը ստիպված են հաղորդել Պատրիկ Ռիկարի անժամանակ մահվան մասին»,- ասվում է «Պերնո Ռիկար»-ի պաշտոնական կայքէջում տեղադրված հաղորդագրության մեջ:
«Պերնո Ռիկար»-ը զբաղեցնում է աշխարհի խոշորագույն ալկոհոլ արտադրող ընկերությունների ցանկի երկրորդ հորիզոնականը: Ընկերությունն արտադրում է այնպիսի աշխարհահռչակ ապրանքանիշեր, ինչպիսիք են` Absolut-ը, Jameson-ը, Malibu-ն, Havana Club-ը, Beefeater-ը, Olmeca-ն և այլն:
«Պերնո Ռիկար»-ին է պատկանում նաև Երևանի կոնյակի գործարանն ու գինի և ալկոհոլային խմիչքներ արտադրող GWS վրացական ընկերությունը:
