Տոկիոն արտաքսում է ձերբակալված չինացիներին՝ լարումից խուսափելու համար
Ճապոնիայի իշխանությունները որոշում են կայացրել դատարան չուղարկել վիճելի կղզիներում ձերբակալված չինացի ակտիվիստներին և նրանց արտաքսել հայրենիք: Այս մասին հաղորդում է Reuters-ը՝ վկայակոչելով Kiyodo գործակալությանը: Պաշտոնական Տոկիոն այս տեղեկությունն առայժմ չի հաստատել:
Չինացի 14 ակտիվիստներից բաղկացած խումբը ձերբակալվել էր երեկ Արևելաչինական ծովի Սենկակու կղզում: Կղզին վիճելի տարածք է հանդիսանում Չինաստանի և Ճապոնիայի միջև: Չինացիների ակցիան նվիրված է եղել երկրորդ համաշխարհային պատերազմում Ճապոնիայի կապիտուլյացիայի 67-ամյակին:
Չինացիների ձերբակալությունից անմիջապես հետո Չինաստանը պահանջել էր ազատ արձակել իր քաղաքացիներին: Ճապոնիան՝ ի պատասխան հայտարարել էր, որ իրենք կգործեն՝ ըստ տեղի օրենսդրության:
Փորձագետների կարծիքով՝ Տոկիոյի կողմից ձերբակալված չինացիներին արտաքսելու որոշումը նպատակ ունի թուլացնել լարվածությունը երկու երկրների միջև:
