Եվրասիական միությունը, օգնելու փոխարեն, կխանգարի
ՀԱԿ անդամ, ՀՀ ԿԲ նախկին նախագահ Բագրատ Ասատրյանն այնքան էլ ոգևորված չէ Եվրասիական միությանը Հայաստանի հնարավոր անդամակցության հեռանկարով:
«Հայաստանը եվրոպական երկիր է,- 168.am-ի հետ զրույցում ասաց Բ. Ասատրյանը` ավելացնելով,- Սա զուտ քաղաքական վճիռ է: Մենք եվրոպական երկիր ենք և մենք եվրոպացի ենք: Եթե մի երկու պաշտոնյա չեն գիտակցում այդքանը, դա չի նշանակում, որ դա այդպես չէ: Հարկավոր չէ այդպիսի քաղաքական խաղերին զոհ դառնալ: Մեր ապագան Եվրոպան է, իսկ Եվրասիական միությունը, օգնելու փոխարեն, ընդհակառակը՝ կխանգարի: Այն իբրև այլընտրանք է առաջարկում Եվրամիությանը՝ գումարած այն հանգամանքը, որ մենք միասնական սահման չունենք այդ կառույցի անդամ երկրների հետ: Մեր հարևան երկրներն արդեն իսկ բացահայտ արտահայտել են իրենց, այսպես ասած, կարծիքն այս ամենի վերաբերյալ: Այս պարագայում մենք կրկին կդառնանք կոկորդին ոսկոր»:
