Ճապոնիան տարածքների հարցը կվիճարկի միջազգային դատարանում
Ճապոնիան պատրաստվում է Ճապոնական ծովում գտնվող վիճելի Տակեսիմա կղզիների հարցը լուծել ՄԱԿ-ի Միջազգային դատարանի միջոցով:
«Մենք լրջորեն ուսումնասիրում ենք այդ հարցը ՄԱԿ-ի միջազգային դատարանի միջոցով լուծելու հնարավորությունը»,- հայտարարել է Ճապոնիայի արտգործնախարար Կոիտիրո Գեմբան, որի խոսքերը մեջբերում է «Ռոսբալտ» գործակալությունը:
Երեկ Հարավային Կորեայի նախագահ Լի Մեն Բակի՝ վիճելի կղզիներ անսպասելի այցելությունից հետո Ճապոնիան Սեուլից ետ կանչեց իր դեսպանին՝ խորհրդակցության համար:
Տակեսիմա ոչ մեծ կղզիախումբը (կորեերեն՝ Տոկտո, միջազգային դասակարգմամբ՝ Լիանկուր)՝ 0.188 քառ. կմ ընդհանուր մակերեսով, գտնվում է Ճապոնական ծովի արևմտյան մասում:
Այդ անմարդաբնակ ժայռոտ տարածքը միջազգային տարաձայնությունների առարկա է դարձել 1945 թ. հետո, երբ Կորեան ազատվեց ճապոնական գերիշխանությունից: Տոկիոն պնդում է, որ Հարավային Կորեան ապօրինի օկուպացրել է այդ տարածքները, որոնք 1905 թվականից մտել են Ճապոնական կայսրության կազմի մեջ:
Սեուլը և Պհենյանն իրենց հերթին հայտարարում են, որ այդ տարածքները միշտ մտել են կորեական պետության կազմի մեջ:
