Սիրիայի դեմ ԱՄՆ նոր պատժամիջոցը կվերաբերի նաև իրանական ընկերություններին
ԱՄՆ-ը նոր պատժամիջոցներ կսահմանի Սիրիայի նախագահ Բաշար ալ Ասադի կառավարության անդամների և այն կազմակերպությունների դեմ, որոնք սատարում են իշխանությանը. տեղեկացնում է Reuters գործակալությունը:
«Մենք ապագայում նույնպես կխստացնենք պատժամիջոցները ռեժիմին սատարող կազմակերպությունների դեմ` ինչպես Սիրիայում, այնպես էլ դրա սահմաններից դուրս»,- ասել է ԱՄՆ պետքարտուղար Հիլարի Քլինթոնը` Աֆրիկա այցի ընթացքում:
Նոր պատժամիջոցները կարող են առնչվել նաև որոշ իրանցի իրավաբանական անձանց:
Այժմ Սիրիայի դեմ արդեն գործում են մի շարք միջազգային պատժամիջոցներ, որոնք ընդունվել են ԱՄՆ-ի և Եվրոպական Միության կողմից:
Հուլիսի վերջին Եվրոպական Միությունը արդեն խստացրել էր պատժամիջոցները և ընդլայնել ֆիզիկական և իրավաբանական անձանց «սև ցուցակը», ում արգելվում է մուտք գործել ԵՄ տարածք: ԵՄ արտգործնախարարները էմբարգո են սահմանել նաև Սիրիային զենքի վաճառքի վրա:
