Ազնավուրի համար ուշ չէ հրաժարվելու այդ խայտառակ բեմադրությանը մասնակցելուց
Այսօր «Սարդարապատ» շարժումը հայտարարություն է տարածել Ախալցխայի բերդի վերանորոգումից հետո նրա վերաբացման կապակցությամբ վրացական իշխանությունների կազմակերպած համերգին հայ մեծանուն երգիչ Շառլ Ազնավուրի մասնակցության կապակցությամբ: Շարժումը որոշ մանրամասներ է պարզել այդ ճարտարապետական հուշարձանի պատմության ու դրա «վրացական վերանորոգման» շուրջ և անհարիր է համարում հայ երգչի մասնակցությունը բացման միջոցառմանը: Հայտարարության մեջ մասնավորապես գրված է.
«Օգոստոսի 16-ին Վրաստանի իշխանությունները նախատեսում են թուրքական կողմի ֆինանսավորմամբ կատարված վերանորոգումից հետո Թուրքիայի ներկայացուցիչների մասնակցությամբ պաշտոնապես վերաբացել 9-րդ դարում կառուցված Ախալցխայի բերդը` այն ներկայացնելով որպես թուրքական: Վերանորոգման գլխավոր «զարդն» է լինելու բերդի տարածքում 18-րդ դարում կառուցված թուրքական մզկիթը, մինչդեռ նույն տարածքում գտնվող հայկական երկու հինավուրց եկեղեցիներից թողնված են ընդամենը մեկի հետքերը:
Հայ ժողովրդի, առաջին հերթին` ջավախահայության նկատմամբ վրաց-թուրքական տանդեմի բացահայտ արհամարհանքի ու հայկական պատմամշակութային ժառանգության յուրացման այս ցուցադրական արարողության գագաթնակետը պետք է դառնա Շառլ Ազնավուրի համերգը, որը տեղի է ունենալու մզկիթի անմիջական հարևանությամբ գտնվող ամֆիթատրոնում:
Բոլոր տվյալները հիմնավոր կասկածներ են տալիս ենթադրելու, որ Ազնավուրը տեղյակ չէ միջոցառման այսպիսի մանրամասներից և ընդամենը դրան մասնակցում է իր հոր ծննդավայրում համերգով հանդես գալու նպատակով: Մինչդեռ ՀՀ իշխանությունները, առնվազն իրենց հանցավոր անտարբերությամբ ու անգործությամբ, փաստացի դարձել են այս հակահայ ծրագրի մեղսակիցները:
«Սարդարապատ» շարժման նախաձեռնող խումբը վստահ է, որ Ազնավուրի համար տակավին ուշ չէ հրաժարվելու հայ ժողովրդի արժանապատվությունը ոտնահարող և իր նախնիների հիշատակն անարգող այս խայտառակ բեմադրությանը մասնակցելուց: Իսկ ՀՀ իշխանությունները պարտավոր են իրենց մեղսակցության համար պատասխան տալ հայ ժողովրդին, այդ թվում` աշխարհահռչակ երգչին»:
