Հայաստանը միշտ ձգտել է Կովկասում կայուն եւ խաղաղ իրավիճակի. Սերժ Սարգսյան
Հայաստանը միշտ ձգտել է Կովկասում կայուն եւ խաղաղ իրավիճակ ստեղծելուն: Այդ մասին Ռուսաստանի նախագահ Վլադիմիր Պուտինի հետ բանակցություններից հետո հայտարարել է Հայաստանի նախագահ Սերժ Սարգսյանը:
«Հենց դրանով է պայմանավորված Լեռնային Ղարաբաղի հիմնախնդրի խաղաղ եւ երկարաժամկետ լուծման որոնման քաղաքականությունը: Մենք կարծում ենք, որ Հարավային Կովկասի անվտանգության հարցում Ռուսաստանն առանցքային դեր է խաղում: Դա վերաբերում է նաեւ Ռուսաստանի ղեկավարության` ղարաբաղյան հիմնախնդրի կարգավորման հարցում Հայաստանի համար չափազանց կարեւոր կառուցողական քայլերին: Մենք շնորհակալ ենք Ձեզ, Վլադիմիր Վլադիմիրովիչ, մշտական ուշադրության եւ այդ ուղղությամբ ձեռնարկած քայլերի համար», – նշել է Հայաստանի նախագահը:
Սերժ Սարգսյանի խոսքով` Հայաստանը շահագրգռված է միջազգային եւ տարածաշրջանային կազմակերպությունների շրջանակում փոխադարձ հետաքրքրության վրա հիմնված արդյունավետ համագործակցության հարցում: Մտադիր ենք հետագայում եւս ջանքեր գործադրել` ուղղված միջազգային հարթակներում արտաքին քաղաքական համակարգման արդյունավետությունը բարձրացնելուն, ասել է նախագահը:
