Թուրքիայի փոխվարչապետ. 1915-ը նաև մեր ողբերգությունն է
Թուրքիայի փոխվարչապետ Բյուլենթ Առընչը հանդիպել է երկրի կրոնական փոքրամասնությունների ներկայացուցիչների հետ. տեղեկացնում է «Ակօս»-ը:
Իր ելույթում փոխվարչապետը նշել է, որ «Աստծո կամքով իրենք ևս առնվազն 10 տարի իշխանության են լինելու»:
Դիմելով հավաքված փոքրամասնությունների ներկայացուցիչներին` Առընչն ասել է. «Թուրքիան խառնել փորձողներ, մեր բարեկամությանը վնաս հասցնել ուզողներ, համայնքների միջև պառակտում մտցնողներ շատ կլինեն: Սակայն թե մենք, թե դուք պետք է արթուն լինենք»:
Նա նշել է, որ անցյալում տեղի ունեցած իրադարձությունների պատճառով համայնքների բազմաթիվ անդամներ լքել են Թուրքիան, սակայն իրենք կցանկանային, որ բոլորը վերադառնան:
Բյուլենթ Առընչը դիմելով հայ համայնքի ներկայացուցիչներին, անդրադարձել է նաև 1915 թ-ի իրադարձություններին:
«Շատ դժվար օրեր են եղել: Օսմանյան կայսրության անկումը, տեղի ունեցած ողբերգական իրադարձությունները` Տրապիզոնում, Մալաթիայում… մինչև Ստամբուլում Հրանտ Դինքի սպանությունը: Դրանք անցյալում տեղի ունեցած ողբերգություններ են, որոնց թիվն աստիճանաբար նվազում է»,- ասել է նա:
Նա հայտարարել է, թե 1915 թ-ի իրադարձությունները ոմանք փորձում են այլ կերպ կներկայացնեն: «Բայց իրականությունն այն է, որ դա նաև մեր ողբերգությունն է: Նրանց մեջ հայեր և թուրքեր կային»,- ասել է փոխվարչապետը:
