28 համայնքներում 34 թեկնածու է առաջադրվել
Հայաստանի 5 մարզերի 380 համայնքներում սեպտեմբերի 9-ին կայանալիք համայնքի ղեկավարի ընտրություններում թեկնածուների առաջադրման առաջին օրը` օգոստոսի 5-ին, առաջադրումներ են եղել ընդամենը 28 համայնքներում, այդ թվում` 5 քաղաքներում: Ընդհանուր առմամբ առաջադրվել է 34 թեկնածու:
Այս մասին «Փաստինֆո» գործակալության թղթակցին հայտնեցին Կենտրոնական ընտրական հանձնաժողովից:
Գյումրիում (Շիրակի մարզ), Էջմիածնում (Արմավիր), Տաշիրում (Լոռի), Կապանում (Սյունիք) նախօրեին առաջադրվել է քաղաքապետի մեկական, իսկ Վանաձորում (Լոռի)` երկու թեկնածու:
Գյումրիում միակ առաջադրվածը ՀՀ Ազգային ժողովի պատգամավոր, «Բարգավաճ Հայաստան» կուսակցության ներկայացուցիչ Սամվել Բալասանյանն է: Էջմիածնում և Տաշիրում ինքնաառաջադրվել են անկուսակցականներ, գործող քաղաքապետեր Կարեն Գրիգորյանը և Նշան Սողոյանը, իսկ Կապանում` գործող քաղաքապետ, ՀՅԴ անդամ Արթուր Աթայանը:
Վանաձորում ՀՀԿ-ի կողմից քաղաքապետի թեկնածու է առաջադրվել ՀՀԿ անդամ, գործող քաղաքապետ Սամվել Դարբինյանը և ինքնաառաջադրվել է անկուսակցական, «Պոպուլեքս» ՍՊԸ տնօրեն Կարեն Թումանյանը:
Թեկնածուների գրանցման փաստաթղթերի ընտրատարածքային ընտրական հանձնաժողով ներկայացնելու վերջնաժամկետը օգոստոսի 10-ի ժամը 18-ն է:
