Սիրիացի ընդդիմադիրները առնվազն 48 իրանցու են պատանդ վերցրել
Առնվազն 48 իրանցի ուխտավոր է առևանգվել Դամասկոսի արվարձաններից մեկում՝ Դամասկոսի միջազգային օդանավակայանից դուրս գալուց հետո, հայտնում է սիրիական «Ալ-Ալամ» հեռուստաալիքը:
Ուխտավորների ավտոբուսը կանգնացվել է Սիրիայի ազատ բանակի զինյալների անցակետի մոտ: Նախնական տվյալներով ուխտավորների մեջ կանայք և երեխաներ չկան:
Սիրիայում շիա իրանցիներն այցելում են Սեյիդա Զեյնաբի Դամասկոսում գտնվող սրբատեղին:
Սիրիայում ճգնաժամի սկսվելուց ի վեր սա իրանցիների առաջին առևանգումը չէ այդ երկրում: Ավելի վաղ, 2 անգամ զինյալները իրանցի ուխտավորների ավտոբուսներ էին գրավել, ինչից հետո Թեհրանը ստիպված էր եղել պաշտոնապես արգելել ցամաքով ուխտավորների ճամփորդությունները:
