Nokia-ն հայրենի Ֆինլանդիայում այլևս բջջային հեռախոս չի արտադրի
Ֆինլանդիայի Սալո քաղաքում Nokia ընկերության գործարանը աշխատանքը կդադարեցնի 2012-ի սեպտեմբերից: Այս մասին հաղորդում է lenta.ru-ն՝ վկայակոչելով ֆիննական Yle պարբերականին:
Գործարանը, որը ներկայում համարվում է Nokia-ի միակ արտադրական հրապարակը Ֆինլանդիայում, վերջին ապարատը թողարկել է հուլիսի 25-ին: Ֆինլանդիան համարվում է Nokia-ի հայրենիքը: Ֆիննական Էսպո քաղաքում էլ գտնվում է ընկերության կենտրոնակայանը:
Ձեռնարկության փակումից հետո աշխատանքը կկորցնի 780 մարդ: Nokia-ն ծրագրում է հեռացված աշխատակիցներին առաջարկել աջակցության ծրագրեր:
Բջջային հեռախոսների արտադրությունը Արևելյան Ասիա տեղափոխելու ծրագիրը Nokia-ն ներկայացրել է փետրվարին: 2012 թվականին ընկերությունը Գերմանիայում և Կանադայում փակել է հետազոտությունների և մշակումների կենտրոնները:
2012-ին Nokia-ն կորցրել է աշխարհում բջջային հեռախոսների խոշորագույն արտադրողի կոչումը՝ իր տեղը զիջելով Samsung-ին: Շուկայում ժողովրդականություն վայելելու տեսանկյունից Symbian և Windows Phone օպերացիոն համակարգերով Nokia սմարթֆոնները զիջել են իրենց դիրքերը Android և iOS համակարգերով սարքերին:
