ԵԱՀԿ ներկայացուցիչները հանդիպել են ադրբեջանական կրակոցից վիրավորված գյուղացուն
ԵԱՀԿ գործող նախագահի դաշտային օգնականներն, այսօր` հուլիսի 25-ին, հանդիպել են Հայաստանի Տավուշի մարզի Ներքին Կարմիրաղբյուր գյուղի խաղաղ բնակչին, ով վիրավորվել է ադրբեջանական կողմից արձակված գնդակից:
ԵԱՀԿ գործող նախագահի դաշտային օգնականներ Անթալ Հերդիչի եւ Իրժի Աբերլեի հանդիպումը Ներքին Կարմիրաղբյուր գյուղի բնակիչ Գոռ Փարսյանի հետ անցել է փակ դռների հետեւում` առանց մամուլի ներկայացուցիչների ներկայության:
Հիշեցնենք, որ Գոռ Փարսյանը վիրավորվել էր ձեռքից, հուլիսի 21-ին` գյուղատնտեսական աշխատանքներ կատարելիս:
Վիրավոր գյուղացու հետ հանդիպմանը նախորդել է սահմանամերձ երեք գյուղերի (Մովսես, Այգեպար եւ Ներքին Կարմիրաղբյուր) ղեկավարների հետ զրույցը: Այն կայացել է Հայաստանի եւ Ադրբեջանի զինված ուժերի շփման գոտում (հայկական Այգեպար եւ ադրբեջանական Ալիբեյլի բնակավայրերի ուղղությամբ) ԵԱՀԿ հերթական դիտարկումից անմիջապես հետո:
Երեք հայկական գյուղերի ղեկավարները ներկայացրել են իրավիճակը շփման գծում, նշել Ադրբեջանի կողմից հայկական գյուղերի ու ճանապարհների ուղղությամբ կրակոցների մասին:
