Մոսկվայում փակվել է Ռուս-թուրքական գիտական կենտրոնը
Մոսկվայում իր աշխատանքն է դադարեցրել Ռուս-թուրքական գիտական կենտրոնը, որը գործում էր Մ. Ռուդոմինոյի անվան արտասահմանյան գրականության համառուսական պետական գրադարանի բազայի հիման վրա, հայտնում է BBC-ի ռուսական ծառայությունը:
Դա տեղի է ունեցել Մոսկվայի ու Անկարայի միջև հարաբերությունների լարվածության ֆոնին, որն առաջացել էր Թուրքիայի ու Սիրիայի սահմանին խոցված ռուսական «Սու-24» ինքնաթիռի պատճառով:
«Ցավոք, մենք ստիպված ենք հայտնել, որ մեր կենտրոնը փակվել է, Արտասահմանյան գրականության գրադարանին կից Ռուս-թուրքական գիտական կենտրոնն այլևս գոյություն չունի: Օսմաներենի կուրսերը դադարեցվում են, ասպիրանտներին ու մագիստրոսներին մենք օգնել չենք կարող»,- հայտնում է թուրքական կենտրոնի կայքը:
Դրա հետ կապված՝ չեղյալ են հայտարարվում կլոր սեղանները, դասախոսություններն ու համաժողովները:
Կենտրոնի նախկին աշխատակիցներին հայտնի չէ դրա փակման պատճառը:
