Տրանսֆերային պատուհանի ամենից խորամանկ, խճճված և դրամատիկ գործարքի հետքերով
Իտալական «Ռոմայի» նախագահ Ջեյմս Պալոտան մեկնաբանել է «Բորդոյի» հարձակվող Մալկոմի տրանսֆերը:
«Առավոտյան Մոնչին հեռախոսով խոսեց Մալկոմի գործակալի հետ և տրանսֆերի կայացման նախնական համաձայնություն ստացավ: Մենք խորհրդակցեցինք փաստաբանների հետ, և կարծես ամեն ինչ կարգին էր:
Երեկ «Բարսան» ներողություն է խնդրել մեզանից, բայց ես չընդունեցի նրանց ներողությունը: Կներեմ «Բարսային», եթե նրանք մեզ տան Մեսսիին:
Դադարեցնե՞լ հարաբերությունները «Բարսելոնայի» հետ: Ոչ, իհա՛րկե ոչ: Այս ակումբն ավելի մեծ է, քան մերը: Ապագայում մենք համագործակցելու ենք նրանց հետ»,- ասել է Պալոտան:
Հիշեցնենք, որ «Բարսելոնան» իրականացրեց տրանսֆերային այս պատուհանի ամենից խորամանկ, խճճված և դրամատիկ գործարքը. 41 միլիոն եվրոյի (+1 միլիոն բոնուս) դիմաց կատալոնական ակումբ տեղափոխվեց «Բորդոյի» կիսապաշտպան Մալկոմը: Դեռևս երկուշաբթի երեկոյան նա պատրաստվում էր թռչել Հռոմ: Ֆրանսիական ակումբը և «Ռոման» պաշտոնապես հայտարարեցին, որ իրենք համաձայնության են եկել: Մի քանի ժամ անց իրավիճակը շրջվեց:
Թե ինչպես է դա տեղի ունեցել, պատմել է միայն «Ռոմայի» մարզական տնօրեն Մոնչին:
«Մալկոմի հետ կապված միջադեպը հեշտ է բացատրել, բայց դժվար է հասկանալ: Մենք բանակցություններ սկսեցինք «Բորդոյի» և խաղացողի գործակալի հետ: Երեք կամ չորս օր տևած աշխատանքից հետո մենք վերջապես համաձայնեցինք ակումբի, խաղացողի և գործակալի հետ»:
17:00 երկուշաբթի. «Բորդոն» և «Ռոման» հայտարարում են, որ նրանք համաձայնեցրել են Մալկոմի տեղափոխության մանրամասները: Ոչ պաշտոնական տվյալներով՝ գործարքը կազմում էր մոտ 32 մլն եվրո էր + 4 մլն բոնուս:
«Երեկոյան ժամը 9-ին Մալկոմը պետք է թռչեր Հռոմ: Հանկարծ, պայմանագիր կնքելուց կես ժամ առաջ, ես զանգ ստացա «Բորդոյի» նախագահ Ստեֆան Մարտինից: Նա ասաց, որ գործարքի շուրջ շատ լուրեր էին տարածվել, այնպես որ, հիմա ավելի լավ է պաշտոնական հայտարարություն ներկայացնել: Ես պատասխանեցի, որ սա մեզ համար լավագույն տարբերակ չէ, քանի որ մեր բաժնետոմսերը գտնվում են ֆոնդային բորսայում, մենք պետք է հետևենք որոշակի կանոններին: Բայց նա պնդեց, և նրանք հայտարարեցին համաձայնության մասին»:
18:00 – 19:00 երկուշաբթի. «Ռոմայի» ղեկավարությանը շշուկներ հասան, որ «Բարսելոնան», ով չի կարողացել «Չելսիից» ձեռք բերել Վիլիանին, ցանկանում է գնել Մալկոմին՝ որպես երկրորդ տարբերակ:
«Ես զարմացա, երբ խաղացողի ներկայացուցիչներից մեկն ինձ ասաց, որ ֆրանսիական ակումբը չեղյալ է հայտարարել Մալկոմի՝ Հռոմ տեղափոխվելը: Ես դիմեցի ակումբի ներկայացուցչին: Նա ասաց, որ «Բարսելոնայի» նոր առաջարկն ավելի լավն է, քան մերն է, և եթե մենք չենք առաջարկում ավելի շատ, մենք չենք կարողանա ստորագրել խաղացողին: Ես պատասխանեցի, որ մենք համաձայնեցրել էինք ամեն ինչ, բայց նա ասաց, որ մեր միջև ոչինչ չի ստորագրվել: Ես մեր նախագահին տեղեկացրեցի ամեն ինչի մասին: Նա թույլ տվեց ինձ առաջ շարժվել և սպասել «Բարսելոնայի» առաջարկին: Ես դրա հետ համաձայն չէի, բայց նա պնդեց»:
23:00 երկուշաբթի. «Ռոմայի» երկրպագուները, ովքեր հավաքվել էին օդանավակայանում, հասկանում են, որ Մալկոմը չի ժամանելու, բայց թե՛ նրանք, թե՛ ակումբի ղեկավարությունը հույս ունեին, որ հաջորդ օրը գործարքը կկայանա:
«Ես տեղեկացրել եմ «Բորդոյի» նախագահին և Մալկոմի գործակալներին, որ «Ռոման» պատրաստ է շրջանցել «Բարսելոնայի» առաջարկը: Նրանք պատասխանեցին, որ մենք պետք է պաշտոնական գրություն ուղարկենք: Ժամը 23:00-ին մենք ուղարկեցինք այդ փաստաթուղթը, և ինձ ասացին, որ, եթե ամեն ինչ լավ լինի, երեքշաբթի մենք կփոխանակվենք փաստաթղթերով, և Մալկոմին կրկին թույլ կտան թռչել Հռոմ»:
Երեքշաբթի առավոտյան Մոնչին զանգահարում է Մալկոմի գործակալին, ով ժամը 12-ին պետք է հանդիպեր «Բորդոյի» նախագահին: Պետք է տեղի ունենար պայմանավորվածություն և ձեռք բերվեր համաձայնություն:
Երեքշաբթի. «Բորդոն» ավելի շատ գումար է պահանջում:
«Հանդիպումից հետո նորից զարմացա: Նրանք սպասում էին նոր բարելավված առաջարկի, քանի որ կատալոնական ակումբը շարունակում էր ակտիվ պայքարել գործարքի համար: Ես ասացի, որ արդեն բավարար է, մենք այլևս չենք մասնակցում խաղին: Մենք թողեցինք բանակցությունները, որովհետև նրանք այն վերածեցին աճուրդի»:
Այժմ «Ռոման» քննարկում է` արդյոք արժե դատի տալ «Բորդոյին», քանի որ գործարքը չկայացավ՝ չնայած արդեն եղել էր հայտարարություն:
Սիրարփի Աղաբաբյան
