Դմիտրի Խվորոստովսկին սիրում էր Հայաստանը
Երգիչը տարիներ առաջ, «Երևանյան հեռանկարներ» միջազգային երաժշտական փառատոնի շրջանակում, երկու անգամ տպավորիչ համերգային ծրագրերով հանդես է եկել Հայաստանում: Երգչի մարդկային հատկանիշների մասին «Արմենպրես»-ը զրուցել է փառատոնի գլխավոր մենեջեր Սոնա Հովհաննիսյանի հետ:
«Փառատոնի շրջանակում նա առաջին անգամ մենահամերգով հանդես եկավ 2013 թվականին Հայաստանի պետական ֆիլհարմոնիկ նվագախմբի հետ: Երկրորդ անգամ 2015-ին մայիսյան եռատոնի առիթով Ռուսաստանի ներքին զորքերի նվագախմբի նվագակցությամբ և դիրիժոր Կոնստանտին Օրբելյանի ղեկավարությամբ Խվորոստովսկին ներկայացրեց «Պատերազմական երգեր» հայտնի ծրագիրը: Դա իսկապես հիշարժան երեկո էր բոլորիս համար»,-նշեց Հովհաննիսյանը:
Գլխավոր մենեջերն ընդգծեց, որ երգիչը սիրում էր Հայաստանը և այստեղ բազմաթիվ ընկերներ էր ձեռք բերել: Մի առիթով նա ասել է, որ հայկական հողն իր համար սուրբ է: «Նա ոչ միայն հրաշալի երգիչ էր, այլև հիանալի մարդ, անմիջական էր, սիրալիր: Վերջին անգամ Խվորոստովսկու հետ կապ եմ հաստատել նրա ծննդյան օրը՝ շնորհավորելով մեծ օպերային երգչին: Կարծում եմ, այն մարդկ, ովքեր նրա հետ առնչություն են ունեցել, խորապես տխուր են այսօր»,-եզրափակեց Սոնա Հովհաննիսյանը:
Դմիտրի Խվորոստովսկին մահացել է Լոնդոնում կյանքի 56-րդ տարում երկարատև հիվանդությունից հետո: 2015 թվականի հունիսի վերջին երգիչը, որ արդեն երկար տարիներ ապրում Էր Լոնդոնում, հայտարարել էր, որ ուղեղի ուռուցք ունի:
Խվորոստովսկուն համաշխարհային ճանաչում բերեց 1989 թվականին նրա հաղթանակը BBC-ի «Աշխարհի երգիչ» հեռուստատեսային մրցույթում Մեծ Բրիտանիայի Քարդիֆ քաղաքում, որտեղ նա արժանացավ «Լավագույն ձայն» տիտղոսին եւ ստացավ գլխավոր մրցանակը: Խվորոստովսկին կատարել է գլխավոր դերերգերը «Եվգենի Օնեգին», «Իոլանտա», «Տրավիատա», «Օթելլո», «Ֆիգարոյի ամուսնությունը», «Դոն Ժուան» և այլ օպերաներում:
Նիսի Nice Opera-ում Պյոտր Չայկովսկու «Պիկովայա դամա» օպերայում դեբյուտից հետո Դմիտրիին սկսեցին հրավիրել ելույթներ ունենալու աշխարհի լավագույն օպերային թատրոններում եւ մասնակցելու հռչակավոր փառատոններին: Նա երգել է Լոնդոնի Քովենթ Գարդենի Թագավորական թատրոնի, Նյու Յորքի Մետրոպոլիտեն-օպերայի, Չիկագոյի Լիրիկ-օպերայի, Փարիզյան օպերայի, Միլանի «Լա Սկալայի» բեմերում:
