«Հայաստանի և Ադրբեջանի նախագահների հանդիպում դեկտեմբերին չի քննարկվում». Նալբանդյան
«Չունեմ տվյալներ, որ դեկտեմբերին Հայաստանի և Ադրբեջանի նախագահները հանդիպելու են»,- այս մասին այսօր ՌԴ ԱԳ նախարար Սերգեյ Լավրովի հետ համատեղ ասուլիսի ընթացքում ասաց ՀՀ ԱԳ նախարար Էդվարդ Նալբանդյանը՝ անդրադառնալով հարցին, թե արդյոք դեկտեմբերին կայանալիք Սարգսյան-Ալիև հանդիպմանը տեղի կունենա՞ բեկում և կա՞ մշակված փաստաթուղթ օրակարգում:
Նալբանդյանն ասաց, որ որպես ՀՀ ԱԳ նախարար, չունի տվյալներ, որ դեկտեմբերին կայանալու է նախագահների հանդիպում:
«Ինչ վերաբերում է բեկմանը, բեկման մասին չէ այս ամենը, նախորդ ասուլիսի ընթացքում ասել եմ, որ դժվար է այս դեպքում հեծանիվ հորինել, կարգավորման հիմնարար սկզբունքները և էլեմենտները սեղանին են, կան մշակումներ, աշխատանքային փաստաթղթեր, մենք բանակցություններ ենք անկացրել երկար ժամանակ հիմնարար սկզբունքների շուրջ, իսկ այսօր Ադրբեջանն ասում է, որ իրեն պետք չեն բանակցությունները հիմնարար սկզբունքների վրա հիմնված, իսկ Դուք բեկումից եք խոսում»,- նշեց ՀՀ ԱԳ նախարարը:
Նա նաև ասաց, որ չնայած, մեղմ ասած, Ադրբեջանի ոչ այն կառուցողական դիրքորոշմանը, իհարկե, պետք է շարունակել բանակցությունները, քանի որ բանակցություններին այլընտրանք չկա:
«Դեկտեմբերին նախագահների հանդիպում չի քննարկվում»,- ասաց նախարարը:
