Դիաբետ. 5 նշան, որոնց մասին գիտեն քչերը. անուշադրության մի մատնեք

Steptohealth.ru-ն գրում է, որ դիաբետն արյան մեջ գլյուկոզայի մակարդակի բարձրացման հետ կապված հիվանդություն է։ Դրա զարգացման հետևանքով կարող են վնասվել աչքերը, երիկամները, նյարդերը։ Սակայն դիաբետով հիվանդ ոչ բոլոր մարդկանց մոտ են արտահայտվում հիվանդությանը բնորոշ նշանները, ինչպիսիք են ծարավը, ոտքերի կամ ձեռքերի թմրածությունը, քաշի անբացատրելի նվազումը, հաճախակի միզարձակումը և այլն։ Կայքը ներկայացրել է հիվանդության նշաններ, որոնց առկայության դեպքում հարկավոր է դիմել բժշկի՝ համապատասխան ախտորոշում և բուժում ստանալու նպատակով։

Մաշկի գրգռվածություն։ Երբ արյան մեջ շաքարի մակարդակը գերազանցում է թույլատրելիի սահմանը, մաշկը չորանում է, քորի զգացում է առաջանում։ Եթե մաշկը գրգռվում է, ոտքերի, ձեռքերի հատվածում քոր եք զգում, համոզվեք, որ դրա պատճառը շրջակա միջավայրն ու կլիման չեն, ապա արյան անալիզ հանձնեք՝ ստուգելու համար գլյուկոզայի մակարդակը։

Դիաբետն ազդում է արյան շրջանառության վրա։ Այդ պատճառով վերջույթներն ավելի խոցելի են. մաշկային խնդիրներն առավել հաճախ առաջանում են հենց ոտքերի ու ձեռքերի հատվածում։

Գլխամաշկի թեփոտում կամ չորություն։ Մարդկանց մեծ մասը չի էլ կասկածում, որ այս երևույթները կարող են որևէ կերպ կապված լինել շաքարային դիաբետի հետ։ Երբ արյան մեջ շաքարի մակարդակը բարձր է, օրգանիզմը սկսում է ավելորդ շաքարից ազատվելու միջոցներ որոնել հիմնականում մեզի միջոցով։

Բայց մեծ քանակով հեղուկի հեռացման դեպքում այլ խնդիրներ են առաջանում. օրգանիզմը սկսում է ջրազրկվել։ Արդյունքում՝ գլխամաշկը չորանում է։ Բացի այդ, այս հատվածում բորբոքումը բարենպաստ պայմաններ է ստեղծում Pityrosporum սնկի բազմացման համար, ինչի հետևանքով էլ առաջանում է թեփը։ Այս միկրոօրգանիզմները մաշկային ճարպն օգտագործում են՝ որպես սնունդ, արագ բազմանում են, ինչի արդյունքում գլխամաշկը թեփոտվում է։

Խռմփոց։ Քնի ընթացքում շնչառության հետ կապված խնդիրների հետևանքով ևս արյան մեջ շաքարի մակարդակը կարող է բարձրանալ։ Այս վիճակը հայտնի է՝ որպես ապնոէ։ Այն բազմաթիվ անհարմարություններ է պատճառում, և լավագույն տարբերակն այս նշանների առաջացման կանխարգելումն է. քնի ընթացքում արտադրվում են սթրեսի հորմոններ, որոնք իրենց հերթին՝ նպաստում են արյան մեջ շաքարի մակարդակի բարձրացմանը։

Սակայն հարկավոր է նաև հաշվի առնել, որ խռմփոցը կապված է բազմաթիվ հիվանդությունների հետ, որոնք առնչություն չունեն դիաբետի հետ։ Ամեն դեպքում պետք չէ անուշադրության մատնել այս խնդիրը. խռմփոցը դժվարացնում է թթվածնի հոսքը թոքեր, ինչի հետևանքով խանգարվում է գլյուկոզայի նյութափոխանակությունը։

Լսողության խնդիրներ։ Եթե լսողության վատացում եք նկատում, խոսեք այս մասին բժշկի հետ։ Մի խումբ հետազոտություններ վկայում են, որ լսողության վատացումը կարող է դիաբետի նախազգուշացնող նշան լինել։ Դիաբետի առկայության դեպքում կարող են վնասվել ներքին ականջի նյարդերը և արյունատար անոթները, ինչի հետևանքով խանգարումներ են առաջանում։

Տեսողության խնդիրներ։ Դիաբետը կարող է անդրադառնալ նաև տեսողության վրա։ Մարդիկ, ում մոտ դեռևս դիաբետ չի ախտորոշվել, կարող են տեսողության լավացում նկատել։ Սակայն այս դեպքում լավացումը ժամանակավոր է լինում։ Խնդիրը նորից գլուխ է բարձրացնում, երբ արյան մեջ գլյուկոզայի մակարդակը կայունանում է։