«Եթե Թուրքիան ներկա լինի ապագա Սիրիայում, այնտեղ հայության ներկայության որևէ հեռանկար չի լինի»
![](https://168.am/wp-content/uploads/2015/11/Anush-Hovhannisyan.jpg)
Թուրքագետ Անուշ Հովհաննիսյանը վստահ է՝ եթե Թուրքիան ներկա լինի ապագա Սիրիայում, ապա երկրում հայության ներկայության որեւէ հեռանկար չի լինի:
«Այն, ինչ կատարվում է Սիրիայում, ազդեցություն է գործում ամբողջ տարածաշրջանի վրա եւ, բնականաբար, չի կարող չընդգրկել նաեւ Հայաստանը: Մենք տեսնում ենք, որ Թուրքիան իր դիվանագիտական լարախաղացության շնորհիվ եթե ոչ երկարատեւ, ապա կարճատեւ կտրվածքով կրկին ընդգծեց իր կարեւորությունը` որպես տարածաշրջանային խաղացող, այսինքն` երկիր, որի հետ ուզած-չուզած հաշվի են նստում գլոբալ խաղացողները` ԱՄՆ-ն, Ռուսաստանը եւ, ինչպես տեսնում ենք, նաեւ Գերմանիան: Նրանք ստիպված են հաշվի նստել Թուրքիայի հետ, քանի որ այն խնդիրները, որոնք ունեն տարածաշրջանում, չեն կարող լուծվել առանց Թուրքիայի: Եթե ինչ-որ խնդիրներ լինեն հայերի հետ, Թուրքիան միշտ կարող է իր ձայնը լսելի դարձնել, ինչը բոլորովին մեր օգտին չէ»-ասաց թուրքագետը:
Նրա խոսքով` այսօր Միացյալ Նահանգները հայտնվել է բավականին բարդ իրավիճակում Թուրքիայի կողմից Սիրիայում իրականացվող գործողությունների պատճառով:
«ԱՄՆ-ի համար քրդերը մնում եմ ամենամարտունակ դաշնակիցները, սակայն ըստ էության` ԱՄՆ կողմից սատարվող այն երկու ուժերը` քրդական զինված ջոկատները եւ ՆԱՏՕ-ի դաշնակից Թուրքիան այժմ պայքարում են միմյանց դեմ: Վերջին շրջանում ԱՄՆ կողմից արված հայտարարությունն այն մասին, որ անընդունելի է այդ ուժերի բախումը, խոսում է ԱՄՆ դժվար կացության մասին»,-եզրափակեց Անուշ Հովհաննիսյանը: