Հայաստանում ՄԱԿ-ի զարգացման ծրագիրը ստացել է 20 մլն դոլարի դրամաշնորհ
ՄԱԿ-ի զարգացման ծրագիրը Կանաչ կլիմայական հիմնադրամի կողմից ստացել է 20 մլն դոլարի դրամաշնորհ` ողջ երկրի տարածքով մեկ էներգաարդյունավետությունը բարձրացնելու, ծախսերն, ինչպես նաեւ ածխածնի երկօքսիդի արտանետումը նվազեցնելու համար:
Էներգիայի ոլորտում տրվող այս դրամաշնորհը առաջինն է Եվրոպայում եւ Կենտրոնական Ասիայում եւ երկրորդն`ամբողջ աշխարհում:
Ֆինանսավորումը ծրագրի թիմին հնարավորություն է տալու արդիականացնել շուրջ 6000 ընտանիքների բնակարանների եւ 150 հանրային շենքերի ներառյալ դպրոցների եւ մանկապարտեզների արտաքին պատերը, մուտքը, տանիքները, առաստաղները, պատուհանները եւ հատակները:
Ծրագրի նպատակն է լուծում տալ տների եւ հանրային շենքերի էներգաարդյունավետության խնդիրներին` այդպիսով նվազեցնելով անտառահատումները եւ էներգիայի սպառումը:
«Սա ամենամեծ ներդրումն է, որը մեր գրասենյակը երբեւէ ստացել է: Մենք հպարտ ենք` պատկերացնելով, թե այս ներդրումը ինչ կարող է նշանակել մեր երկրի ապագայի համար», ասել է ՄԱԿ-ի զարգացման ծրագրի հայաստանյան գրասենյակի կլիմայական փոփոխությունների փորձագետ Դիանա Հարությունյանը:
Կանաչ կլիմայական հիմնադրամը 2015 թվականին ստորագրված փարիզյան համաձայնագրի առաջնային ֆինանսական գործիքն է, որն ուղղված է մեղմացմանը` նվազեցնելով գազի արտանետումներն, ինչպես նաեւ կլիմայական փոփոխությունների հարմարեցմանը:
