«Ազատ դեմոկրատները» Թբիլիսիի քաղաքապետին աղբ են «նվիրել»
Վրաստանի «Ազատ դեմոկրատներ» կուսակցությունը Թբիլիսիի քաղաքապետին աղբով լի արկղ է «նվիրել», հայտնում է «Գրուզիա օնլայնը»:
Արկղը քաղաքապետարան են տարել «Ազատ դեմոկրատներ» կուսակցության` Թբիլիսիի Գլդանի շրջանի մեծամասնական ընտրակարգով պատգամավորության թեկնածու Ամիրան Գիգուաշվիլին և կուսակցության երիտասարդական կազմակերպության ներկայացուցիչները:
Արկղը կապված է եղել տոնական ժապավենով, որին ամրացված է եղել աղբ և գրություն. «Գլդանի բնակիչների նվերը` Թբիլիսիի քաղաքապետին»:
Նվերը քաղաքապետարանը չի ընդունել:
Ինչպես լրագրողներին հայտնել է Գիգուաշվիլին, աղբը երիտասարդական կազմակերպության անդամները հավաքել են Գլդանի լճի մերձակայքից, որն աղբավայրի է վերածվել:
