Կառավարությունը փոխհատուցում է Սիրիայի, Լիբանանի և Իրաքի հայերի ՀՀ անձնագրի պետտուտքը
ՀՀ քաղաքացու անձնագիր տալու կամ այն փոխանակելու համար պետական տուրքի վճարումից ազատելու արդյունքում չգանձված պետական տուրքի գումարը վճարողների փոխարեն ՀՀ պետական բյուջե վճարելու նպատակով կառավարությունն Արտաքին գործերի նախարարությանը 2016 թվականի առաջին կիսամյակում կհատկացնի 19 մլն 675 հազ. դրամ: Այս մասին որոշման նախագիծն ընդգրկված է կառավարության մայիսի 19-ի նիստի օրակարգում:
2016թ. 1-ին եռամսյակի ընթացքում տրամադրվել է օտարերկրյա պետություններում վավերական 321 անձնագիր, սակայն պետական տուրք չի գանձվել: Ընդ որում, այդ անձնագրերը տրամադրվել են Դամասկոսում (129 գործ), Հալեպում (134 գործ), Լիբանանում (54 գործ),Բաղդադում (4 գործ) գտնվող ՀՀ դեսպանությունում` ՀՀ քաղաքացիներին և ազգությամբ հայ այն օտարերկրյա քաղաքացիներին, որոնք ձեռք են բերել ՀՀ քաղաքացիություն և դիմել են առաջին անգամ ՀՀ անձնագիր ստանալու համար:
«ՀՀ կառավարությունն ամեն կերպ փորձում է աջակցել ազգությամբ հայ այն օտարերկրյա քաղաքացիներին և ՀՀ քաղաքացիներին, որոնց մշտական բնակության օտարերկրյա պետությունում ստեղծվել է այնպիսի արտակարգ իրավիճակ, որը սպառնում է քաղաքացիների կյանքին կամ առողջությանը»,- նշված է նախագծի հիմնավորման մեջ:
