«Կարծում եմ՝ ադրբեջանցիները հիմա պատրաստ են որևէ փաստաթուղթ ստորագրել, միայն թե Ղարաբաղը չմտնի այդ բանակցային դաշտ». Արման Նավասարդյան
Այս պահին պետք է բացառել որևէ տարածքի հանձնում Ադրբեջանին, իսկ հետագայում ժամանակը ցույց կտա: Այս կարծիքին է Արտակարգ և լիազոր դեսպան Արման Նավասարդյանը, ով այսօր լրագրողների հետ հանդիպման ժամանակ նկատեց, որ այսօր հայկական կողմի տրամադրվածությունն այնպիսին է, որ չպետք է որևէ բան զիջել:
Նա նշեց, որ, եթե անգամ հետագայում որևէ տարածք զիջելու հարց լինի, դա պետք է լինի «մինիմալը»:
Հիշեցնենք, որ օրերս Լեռնային Ղարաբաղի նախագահ Բակո Սահակյանը հարցազրույց էր տվել՝ բացառելով տարածքների վերադարձի հնարավորությունը: Ըստ Ա. Նավասարդյանի՝ այսօրվա քաղաքականության մեջ դա ամենաճիշտ դիրքորոշումն է:
Ա. Նավասարդյանի խոսքով՝ առաջին խնդիրը, որ դրված է այսօր մեր դիվանագիտության առջև, դա վերադարձնելն է Ղարաբաղին բանակցային սեղանի շուրջ, առանց դրա, Ա. Նավասարդյանի կարծիքով՝ Հայաստանը չի գնա բանակցությունների:
Ա. Նավասարդյանը կարծում է՝ ադրբեջանցիներն «ահավոր» վախենում են Ղարաբաղի՝ բանակցային սեղան վերադարձից. «Ինձ թվում է՝ նրանք հիմա պատրաստ են որևէ փաստաթուղթ ստորագրել, միայն թե Ղարաբաղը չմտնի այդ բանակցային դաշտ: Իսկ եթե Ղարաբաղը ճանաչվեց՝ որպես միջազգային իրավունքի սուբյեկտ, դրան հետևելու է նաև Ղարաբաղի ճանաչումը»:
