Ցանցահենները կոտրել են Դմիտրի Կիսելյովի էլեկտրոնային փոստը. ի՞նչ գաղտնիքներ է այն պատմում հաղորդավարի մասին
«Անանուն ինտերնացիոնալի» ցանցահենները նախօրեին հայտարարել են, թե կոտրել են «Ռուսաստանն այսօր» միջազգային մեդիախմբի գլխավոր տնօրեն, «Ռոսիա-1» հեռուստաալիքի Вести недели ծրագրի հաղորդավար Դմիտրի Կիսելյովի էլեկտրոնային փոստն ու WhatsApp-ի օգտահաշիվը, տեղեկացնում է theins.ru-ն:
Ցանցահենների հաղորդմամբ՝ նամակագրության էլեկտրոնային ծավալը կազմում է 11 գիգաբայթ: Հաղորդագրությունը թվագրվում է 2009 թվականից մինչև 2016թ. ապրիլն ընկած ժամանակահատվածը:
Ցանցահենների խոսքով՝ Կիսելյովը նամակագրություն է վարում բազմաթիվ հայտնի մարդկանց հետո, որոնց թվում են ՌԴ մշակույթի նախարար Վլադիմիր Մեդինսկին, տնտեսագետ Նիկիտա Կրիչևսկին, մեդիամենեջեր Արամ Գաբրիելյանովը:
Կիսելյովի էլեկտրոնային փոստի ուսումնասիրությունից պարզ է դառնում, որ նա հարցում է ուղարկել Ուկրաինայի անվտանգության ծառայությանը, նամակագրություն է վարում բրիտանական իրավաբանական ընկերության հետ, որի օգնությամբ փորձում է հասնել Եվրամիության կողմից իր նկատմամբ պատժամիջոցների չեղարկմանը:
Հրապարակված նյութերից պարզ է դառնում, որ Կիսելյովը բավական շռայլ է վարձատրվել իր քարոզչական գործունեության համար: Օրինակ՝ նա 2014թ. գնել է 204 քմ մակերեսով բնակարան Ցվետնոյ բուլվարում, որի արժեքը գնահատվում է 4.6 միլիոն դոլար: Սա նրա միակ անշարժ գույքը չէ: Նա ունի նաև առանձնատուն ու անգամ գինեգործական տնտեսություն Կոկտեբելում (Ղրիմ): Նրա առանձնատուն ունենալու փաստը ոչ ոքի համար գաղտնիք չէ: Դա թաունհաուս է՝ 5 սանհանգույցով, լողավազանով, որտեղից տեսարան է բացվում դեպի Կոկտեբելի ծովածոցը:
Հաղորդավարի նամակագրությունից պարզ է դառնում, որ ղրիմյան հանգստի համար Կիսելյովը գնել է ամերիկյան մոտորանավակ՝ 48 893 դոլարով:
Ցանցահենները պարզել են, որ նրա կինը՝ Մարիա Կիսելյովան, գնում է հոգեբանության մասին պատրաստի հոդվածներ և դրանք հրապարակում համապատասխան պարբերականներում՝ գումարի դիմաց:
Ռուսական Дождь հեռուստաալիքը չի կարողացել մեկնաբանություններ ստանալ Կիսելյովից հրապարակված տեղեկությունների առնչությամբ:
«Անանուն ինտերնացիոնալ» ցանցահենային խումբը հայտնի է նաև «Շալտայ-Բոլտայ» անվանումով: Խումբը հայտնի է դարձել ռուս քաղաքական գործիչների նամակագրությունը հրապարակելով: Նրանք հրապարակել էին անձնական նամակագրություններ, որոնք, ցանցահենների խոսքով, պատկանում էին ՌԴ փոխվարչապետ Արկադի Դվորկովիչին, ՌԴ նախագահի ադմինիստրացիայի ներքին քաղաքականության վարչության պետ Թիմուր Պրոկոպենկոյին: Խումբը ստանձնել էր նաև ՌԴ վարչապետ Դմիտրի Մեդվեդևի Twitter-ը կոտրելու պատասխանատվությունը:
2014թ. հուլիսին «Շալտայ-Բոլտայ» բլոգը «Ռոսկոմնադզորը» ներառել էր արգելված կայքերի ռեեստրում: 
