Սերժ Թանկյանին հուզել է «Վերջին բնակիչը» ֆիլմի պատմությունը. բացառիկ հարցազրույց
Ամերիկահայ ռոք երգիչ, հայտնի «System of a Down» ալտերնատիվ մետալ-ռոք խմբի մենակատար Սերժ Թանկյանը վստահ քայլեր է կատարում կինոերաժշտության ասպարեզում: Հայոց ցեղասպանության տարելիցին նվիրված Ալեք Մուհիբյանի և Կարին Հովհաննիսյանի «1915» ֆիլմը դիտած կինոսերները հասցրել են հիանալ թանկյանական կոմպոզիտորական տաղանդով: Աշխարհ ահռչակ երգչի երկրպագուները նրանով հպարտանալու ևս մեկ առիթ ունեն. նա երաժշտություն է գրել Ջիվան Ավետիսյանի «Վերջին բնակիչը» ֆիլմի համար: Թանկյանի հեղինակած երաժշտությունն արդեն հաջողությամբ ձայնագրվել է «System of a Down»-ի մենակատարի հայրենիքում: «Վերջին բնակիչը» ֆիլմը տարվա երկրորդ կեսին կներկայացվի հանրությանը, իսկ մինչ այդ «Արմենպրես»-ը Սերժ Թանկյանի հետ զրուցելու հնարավորություն է ունեցել ֆիլմի և նոր կինոերաժշտության շուրջ:
– Սիրելի Սերժ Թանկյան, առաջին հերթին ուզում եմ շնորհակալություն հայտնել մեր հարցերին պատասխանելու համար: Հրաշալի է Ձեզ տեսնել որպես նոր հայկական ֆիլմի կոմպոզիտոր: Ինչպե՞ս էր Ջիվան Ավետիսյանի նոր «Վերջին բնակիչը» ֆիլմի երաժշտության վրա աշխատելը: Ինչպե՞ս Ձեզ խնդրեցին գրել երաժշտություն ֆիլմի համար:
– Ես հանդիպեցի Ջիվանին ընդհանուր ընկերոջ միջոցով: Նա մոտեցավ ինձ և հարցրեց` արդյոք ես հետաքրքրված կլինե՞մ կարդալու «Վերջին բնակիչը» ֆիլմի սցենարը: Այդ ժամանակ ես հնարավորություն ունեցա տեսնելու նրա «Ընդհատված մանկություն» ֆիլմը և շատ հուզված էի նրա մտերմիկ պատմություններից, որոնք վեր էին հանում մարդկային արժեքները պատերազմական խառնաշփոթի պահերին: Հետո ինձ հրավիրեցին Լոս Անջելես` դիտելու «Թևանիկը», և ես տպավորված էի նրա ջանքերով: Որոշեցի աջակցել նրան` գրելով «Վերջին բնակիչը» ֆիլմի համար երաժշտությո ւն: Ջիվանը մեծ հեռանկար ունի և իր ֆիլմերում պատմություն ներկայացնելու լավ ունակություն: Նրա կինոարվեստը, զուգորդված Արցախի բնատեսարանի հետ, ներկայացնում է համոզիչ կադրեր:
– Ձեզ համար ի՞նչն է յուրահատուկ «Վերջին բնակիչը» ֆիլմում: Ի՞նչն է Ձեզ ոգեշնչել Ձեր աշխատանքի ընթացքում:
– Ամենաշատը ես ոգեշնչվեցի ֆիլմի պատմությունից, այն ցավից, որ զգացին թե՛ գլխավոր դերակատար Աբգարը, թե՛ իր Ադրբեջանցի ընկեր Իբրահիմն իր ընտանիքի հետ: Շատ հուզիչ էր իրար հետ մեծացած 2 հոգու ընկերությունը, ովքեր միասին դաստիարակել էին երեխաներին, իսկ հիմա բաժանվել են պատերազմի անջրպետով:
– Ի՞նչ եք կարծում` ֆիլմը հաջողություն կունենա:
– Ես հույս ունեմ:
– Ինչի՞ վրա եք աշխատում այս պահին: Մեկ ուրիշ հայկական ֆիլմի համար գրված երաժշտություն սպասե՞նք:
– Ես այս պահին աշխատում եմ մեծ թվով կինո և ոչ կինո նախագծերի վրա, բայց ոչ մեկի մասին չեմ խոսի մինչև ճիշտ ժամանակը գա:
Ռեժիսոր Ջիվան Ավետիսյանի «Վերջին բնակիչը» ֆիլմի համար Սերժ Թանկյանի գրված երաժշտությունը ձայնագրվել է Հայաստանում: Ձայնագրման աշխատանքներում ներգրավված են եղել Հայաստանի ազգային ֆիլհարմոնիկ նվագախումբը՝ գեղարվեստական ղեկավար և գլխավոր դիրիժոր Էդուարդ Թոփչյանի և «Հովեր» պետական կամերային երգչախումբը՝ գեղարվեստական ղեկավար և խմբավար Սոնա Հովհաննիսյանի գլխավորությամբ:
«Վերջին բնակիչը» ֆիլմի նկարահանումները տեղի են ունեցել Արցախում՝ Խաչմաչ գյուղում։ Ֆիլմը պատմում է ազգամիջյան հակամարտության արդյունքում բռնի տեղահանված, հայաբնակ գյուղում միայնակ մնացած մի հայ մարդու՝ Աբգարի մասին: Աբգարն, ապրելով թշնամական միջավայրում, փնտրում է իր աղջկան: Վերջինս հոգեկան խանգարում է ստացել՝ տեսնելով, թե ինչպես է վայրենացած ամբոխը Սումգայիթում` կրակների մեջ այրում իր ամուսնուն: «Վերջին բնակիչը» ֆիլմը ստեղծվել է միջազգային համագործակցության արդյունքում: Այն «Ֆիշ այ Արթ» մշակութային հիմնադրամի, Հայաստանի ազգային կինոկենտրոնի և լիտվական «Արտբոքս» կինոընկերության համատեղ արտադրություն է: Ֆիլմի դերասանական կազմում հայտնի և սիրված դերասաններ Ալեքսանդր Խաչատրյանի, Սոս Ջանիբեկյանի, Նարինե Պետրոսյանի, Բաբկեն Չոբանյանի հետ միասին ընկդգրվել են նաև համաշխարհային ճանաչում ունեցող դերասաններ Հոմայուն Էրշադին` Իրանից, Սանդրա Դաուկշայտե Պետրուլենեն` Լիտվայից, Դիմիտրա Խատուպին` Հունաստանից, Աննե Բեդիանը` ԱՄՆ-ից, Արմեն Գրիգորյանը (Գրեյգ)` Ռուսաստանից։
Հարցազրույցը` Ռոզա Գրիգորյանի
