Մարզադաշտի աշխատակիցները երեխայից խլել են Մեսսիի նվիրած մարզաշապիկը
Պրիմերայի 21-րդ տուրում «Բարսելոնա»-«Մալագա» խաղի ավարտին խաղադաշտ էր վազել մի փոքրիկ տղա: Չնայած անվտանգության աշխատակիցների՝ երեխան հասել էր Մեսսիին, գրկել նրան և խնդրել մարզաշապիկը: Արգենտինացին, սովորության համաձայն, չէր մերժել:
Բայց ավելի ուշ երեխայի հարևանուհին Ֆեյսբուքում շարժում է սկսել` պահանջելով երեխային վերադարձնել նվերը:
Marca-ն, վկայակոչելով փոքրիկի հարևանուհու խոսքերը, նշում է, որ անվտանգության աշխատակիցները երեխային ուղեկցել են մարզադաշտից դուրս, այնուհետև խլել են շապիկը:
«Տղայի անունը Կևին է, նա 15 տարեկան է և իմ տղայի ընկերն է: Մեսսին նրան տվել էր մարզաշապիկը, ինչից հետո «Լա Ռոսալեդայի» անվտանգության աշխատակիցներն այն խլել են երեխայից:
Ո՞ վ էր նրանց իրավունք տվել: Նրանք դրանից ի՞նչ շահեցին, որ զրկեցին երեխային իր երազանքի՞ց»,- գրել է Յոլանդան իր ֆեյսբուքյան էջում:
Սիրարփի Աղաբաբյան
