Today’s Zaman-ի գլխավոր խմբագիրը Դավութօղլուին վիրավորելու համար դատապարտվել է պայմանական ազատազրկման
Թուրքիայի ընդդիմադիր Today’s Zaman թերթի նախկին գլխավոր խմբագիր Բյուլենթ Քենեշը դատապարտվել է 14 ամսվա պայմանական ազատազրկման երկրի վարչապետ Ահմեդ Դավութօղլուին վիրավորելու համար:
Անկարայի դատարանի կարծիքով՝ լրագրողը վիրավորական արտահայտություններ է թույլ տվել Դավութօղլուի հասցեին Twitter-ի իր էջում:
Լրագրողի փաստաբանի փաստարկները, որի համաձայն՝ թվիթները պետք է դիտարկել մամուլի ազատության ու կարծիքի արտահայտման սահմանադրական ազատության շրջանակում, դատարանը հաշվի չի առել, հայտնում է Zaman թերթը:
Նրան ձերբակալել էին միջազգային օդանավակայանում Թուրքիայից հեռանալու փորձ կատարելիս:
Ավելի վաղ Թուրքիայի իշխանությունների ու դատական հայցերի ճնշման ներքո Քենեշը ստիպված էր հեռանալ թերթի գլխավոր խմբագրի պաշտոնից:
Haber7 թերթն ավելի վաղ գրել է, որ վերջինս սերտ կապեր է ունեցել իսլամիստ հասարակական գործիչ, ամերիկաբնակ Ֆեթուլլահ Գյուլենի շարժման հետ:
Թուրքիայի կառավարությունը թերթը համարում է Գյուլենի շարժման տպագիր մարմինը: Թուրքիայում պարբերաբար օպերացիաներ են իրականացվում Գյուլենի կողմնակիցների դեմ՝ նրանց մեղադրելով ահաբեկչական կազմակերպություններ ստեղծելու մեջ:
