Վաշինգտոնի և մերձակա տարածքների բնակիչները նախապատրաստվում են ռեկորդային ձյան փոթորկին
Եղանակի տեսության տվյալների համաձայն, Վաշինգտոնում և մոտակա նահանգներում ընթացիկ երեք օրերի ընթացքում 30-90 սանտիմետր ձյան տեղումներ են սպասվում: Տարածաշրջանի բնակիչները նաև նախազգուշացվել են ուժեղ և գուցե կործանիչ քամիների, զգալի սառցակալման և ափամերձ տարածքների ջրհեղեղների մասին: Այս մասին հաղորդում է «Ամերիկայի ձայնը»:
Մինչ քաղաքների բնակչությունը զբաղված է անհրաժեշտ պարագաների գնումներով, քաղաքային աշխատակիցները գլխավոր ճանապարհներին աղաջրի լուծույթ են շաղ տալիս: Վիրջինիայի տեխնիկայի խանութներից մեկի աշխատակից Դերեք Սթեյթոնի խոսքերով, հինգշաբթի օրը իրենց պահոցում առկա ձյան հալեցման մեքենաների, ձնահավաք բահերի և նույնիսկ փչող սարքերի քանակը հաճախորդներին չէր բավականացնում:
Դերեքը ասում է,- “Ամենաարագ վաճառվող ապրանքը ձնահավաք բահերն էին: Մեր խանութում ընդհամենը երեք չորս բահ է մնացել”:
Նյու Յորք քաղաքի վերահսկիչ Էնթոնի Սանթինոն բնակիչներին քաջալերում է նախապատրաստվել, որպեսզի դժվարությունների առջև չկանգնեն:
Էնթոնի Սանթինոն ասում է. «Զգույշ եղեք և շաբաթ օրը տնից դուրս մի եկեք, եթե դրա բացարձակ անհրաժեշտությունը չկա: Ձեր մեքենաները ճանապարհների եզրերին մի թողեք, այլ կանգնեցրեք տների մուտքի մոտ, որպեսզի քաղաքային աշխատակիցների համար ձնահեռացման գործընթացը դյուրին լինի: Ակնհայտորեն, եթե փողոցները ողողված են լինում ավտոմեքենաներով, խանգարում են ձնահեռացման մեր աշխատանքները»:
Մերիլենդի նահանգապետ Լարրի Հոգանը սկսած ուրբաթ երեկոյից արտակարգ դրություն է հայտարարել:
Նա ասում է. «Մեր առաջին և գերագույն նպատակն է ապահովել Մերիլենդի բնակիչների անվտանգությունը»:
Լարված են հատկապես երկրի մայրաքաղաքի բնակիչները: Վաշինգտոնը նույնիսկ ամենաչնչին տեղումների հետևանքով կաթվածահար լինելու համբավ ունի: Միայն 5 սանտիմետր ձյան տեղումենրի պատճառով չորեքշաբթի օրը մեծաթիվ վարորդներ խցանման մեջ էին հայտնվել: Շատերը նույնիսկ ավտոմեքենաները լքել էին ճամփեզրերին և հեռացել:
Վաշինգտոնի վարորդներից մեկը ասում է. «Այստեղ կար մոտ քսան մեքենա: Ոստիկանները ժամանեցին ընդհամենը հինգ ժամ հետո: Ավտոմեքենաները գնդակների նման իրար էին բախվում: Ոստիկաններից մեկը ինձ ասաց, որ եթե մեքենաս լքեի և հեռանայի, ապա իմ դեմ մեղադրանք կներկայացվեր վրաերթի և փախուստի համար»:
Վաշինգտոնի մերձակայքի բնակիչներից մի քանի ժամ էր պահանջվել տուն հասնելու համար: Քաղաքի սղլիկ փողոցները բազմաթիվ պատահարների պատճառ էին դարձել, Վաշինգտոնի ոստիկանապետ Մյուրիել Բոուզերին ստիպելով ներողություն խնդրել:
Նա ասում է. «Մենք ձեր ներողամտությունն ենք հայցում ոչ հրատապ արձագանքի համար»:
Ձյան փոթորիկի ժամանակ Վաշինգտոնի քաղաքային տրանսպորտը չի գործի և նույնիսկ խոշոր փողոցները մաքրելուց հետո երթևեկությունը միառժամանակ լիարժեք չի վերսկսվի:
