Ադրբեջանում իրավապաշտպանները հանդիպել են հայ ռազմագերի Անդրանիկ Գրիգորյանի հետ
Ադրբեջանի Կտտանքների դեմ հանձնաժողովի նախագահ, իրավապաշտպան Էլչին Բեհբուդովը, նրա տեղակալ Էլչին Շիրինովն ու նրա օգնական Բահման Իմանովը հանդիպել են Ադրբեջանում պահվող հայ զինծառայող Անդրանիկ Գրիգորյանի հետ, հայտնում է ադրբեջանական APA գործակալությունը:
Էլչին Բեհբուդովը հայտարարել է, որ 1991թ. ծնված Անդրանիկ Գրիգորյանը որևէ բողոք չունի իրեն պահելու պայմաններից ու իր հանդեպ վերաբերմունքից:
«Անդրանիկ Գրիգորյանը ինքնակամ է անցել ադրբեջանական կողմը: Մեզ հետ զրույցի ժամանակ ասել է, որ Ադրբեջանում իր հետ շատ լավ են վարվում: Ի տարբերություն նրա զորամասի՝ Ադրբեջանում օրական 3 անգամ է կերակրվում: Շաբաթը 3-4 անգամ ունի լողանալու, մաքուր օդում զբոսնելու հնարավորություն: Սենյակում կա հեռուստացույց: Անդրանիկն ասել է, որ իր զորամասում շատ վատ պայմաններ են եղել:
Վաշտի հրամանատար Սուրեն Բալայանն ու մյուս զինծառայողները պարբերաբար ծեծել են իրեն: Կարմիր խաչի միջազգային կոմիտեի ներկայացուցիչները նրան հաճախ են այցելել, ինչի շնորհիվ էլ նա ընտանիքին նամակներ է ուղարկում: Նա նաև ասել է, որ կարոտում է իր սիրած աղջկան՝ Նուշիրին»,-պատմել է Բեհբուդովը:
Բեհբուդովի խոսքով՝ հանդիպման նպատակը եղել է հայ զինծառայողի պահման պայմանները տեսնելը:
Հիշեցնենք, որ մարտի 22-ին ԼՂՀ ՊԲ-ն հաղորդագրություն էր տարածել, որ նույն օրը ՊԲ արևելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, հակառակորդի կողմն էր անցել ՊԲ զինծառայող, 1991թ. ծնված շարքային-պայմանագրային Անդրանիկ Գրիգորյանը:
