ԱԺ աշխատակազմը պատգամավորների բացակայությունների հետ կապված ուսումնասիրությունները դեռ չի ավարտել
![](https://168.am/wp-content/uploads/2015/02/AJ-1.jpg)
ԱԺ աշխատակազմը պատգամավորների բացակայությունների հետ կապված ուսումնասիրությունները դեռ չի ավարտել, հետևաբար՝ ԱԺ նախագահ Գալուստ Սահակյանը Գագիկ Ծառուկյանին մանդատից զրկելու վերաբերյալ արձանագրություն չի ուղարկել ԿԸՀ: Այս մասին 168.am-ին ասաց ԱԺ հասարակայնության հետ կապերի և լրատվության վարչության պետ Արսեն Բաբայանը:
Թե ե՞րբ կավարտվեն ուսումնասիրությունները՝Ա.Բաբայանը դժվարացավ նշել: Նա հավաստեց, որ դրանց ավարտի և ԱԺ նախագահի համապատասխան որոշման մասին հանրությանն անմիջապես կտեղեկացնեն:
Հիշեցնենք, որ ՍԴ որոշմամբ, ՀՀ Սահմանադրության 67-րդ հոդվածի պահանջներից ելնելով «Ազգային ժողովի կանոնակարգ» ՀՀ օրենքի 99-րդ հոդվածի 4-8-րդ մասերը պետք է իրավակարգավորման այնպիսի հնարավորություն նախատեսեն, որի պայմաններում օրենքով նախատեսված իրավաբանական նշանակություն ունեցող փաստն ընդունելով ի գիտություն` կազմվի արձանագրություն պատգամավորի լիազորությունները` իրավունքի ուժով դադարելու վերաբերյալ: Այսինքն, հարցը քվեարկության չի դրվելու: Անհրաժեշտ է նաև «Ազգային ժողովի կանոնակարգ» ՀՀ օրենքի 6-րդ և 99-րդ հոդվածներում փոխհամաձայնեցված հաշվի առնել այն հանգամանքը, որ պատգամավորի բացակայությունը կարող է հարգելի համարվել միայն օրենքով նախատեսված կոնկրետ հիմքերի առկայության դեպքում ու կարգով, և այն չի կարող հայեցողական գնահատման արդյունք լինել: