ՀՀ ԳԱԱ Օրբելու անվան Ֆիզիոլոգիայի ինստիտուտը միակն է Հայաստանում, որ ունեցավ կոնֆոկալ մանրադիտակ
Փետրվարի 13-ին ՀՀ ԳԱԱ Օրբելու անվան ֆիզիոլոգիայի ինստիտուտում տեղի կունենա երեք գծային լազերային սկանավորող կոնֆոկալ մանրադիտման լաբորատորիայի բացման արարողությունը:
ՀՀ ԳԱԱ Ֆիզիոլոգիայի ինստիտուտը միակն է Հայաստանում, որ ձեռք է բերել կոնֆոկալ մանրադիտակ: Այն բժշկակենսաբանական ուսումնասիրություններում առաջնային եւ առավել կիրառելի գործիքներից է: Մանրադիտակի միջոցով պարզաբանվում են նեյրոֆիզիոլոգիական եւ հյուսվածքաբանական կառուցվածքների խնդիրները: Այն պատկերում է սուպրամոլեկուլիար մակարդակի կառուցվածքային եւ մակերեւութային կենսաբանության ոլորտի խնդիրները: ՀՀ ԳԱԱ Ֆիզիոլոգիայի ինստիտուտը մանրադիտակը ձեռք է բերել ՀՀ կրթության եւ գիտության նախարարության Գիտության պետական կոմիտեի «Գիտական սարքավորման արդիականացման մրցութային ծրագրի» դրամաշնորհի միջոցներով:
Լաբորատորյայի բացման արարողությանը ելույթներով հանդես կգան ՀՀ ԳԱԱ Օրբելու անվան Ֆիզիոլոգիայի Ինստիտուտի տնօրեն Նաիրա Այվազյանը, կոնֆոկալ մանրադիտակն արտադրող գերմանական «Լեյկա» ընկերության ներկայացուցիչ Յան Պալան: Միջոցառմանը հրավիրված են բժշկակենսաբանական հաստատությունների տնօրեններ, գիտնականներ:
ՀՀ ԳԱԱ Տեղեկատվական-վերլուծական կենտրոն
