ԱՄՆ-ն Թուրքիային չի մատակարարի F-35 կործանիչներ
ԱՄՆ պետքարտուղարությունը Կոնգրեսին ներկայացրած պաշտոնական նամակում հայտնել է, որ Թուրքիան դեռևս չի կատարել ռուսական «S-400» զենիթահրթիռային համակարգերի հետ կապված պահանջները, ուստի «F-35» կործանիչների մատակարարումը չի իրականացվի։ Այս մասին տեղեկացնում է ermenihaber.am-ը։
2026թ. հուլիսի 22-ով թվագրված նամակում, որը գրվել է ԱՄՆ նախագահ Դոնալդ Թրամփի անունից, նշվում է, որ F-35-ի ծրագրին վերադառնալու համար Թուրքիան պիտի լիովին հրաժարվի «S-400» ՀՕՊ հհամակարգից և երաշխիքներ տա ապագայում նմանատիպ համակարգեր չգնելու վերաբերյալ:
Չնայած տարաձայնություններին՝ Վաշինգտոնն ու Անկարան շարունակում են բանակցությունները «S-400»-ի հարցը լուծելու և ՆԱՏՕ-ի շրջանակում համագործակցությունն ամրապնդելու ուղղությամբ։
ԱՄՆ պետքարտուղարության նամակում ընդգծվել է նաև, որ Թուրքիան աջակցում է Վաշինգտոնի խաղաղարար ջանքերին մի շարք ուղղություններով, այդ թվում՝ Ռուսաստան-Ուկրաինա, Ադրբեջան-Հայաստան և Գազայի հակամարտություններում:
Չնայած ՀԱՄԱՍ-ի հետ Անկարայի կապերի շուրջ առկա քննադատությանը՝ նամակում նշվել է, որ Թուրքիան օգտագործել է իր ազդեցությունը ՀԱՄԱՍ-ի քաղաքական ղեկավարության վրա՝ նպաստելով ԱՄՆ նախագահի Գազայի խաղաղության ծրագրի ընդունմանն ու հրադադարի հաստատմանը, ինչպես նաև դարձել է նոր ձևավորված «Խաղաղության խորհրդի» հիմնադիր անդամ:
