Չեմպիոնների լիգայի որակավորման երկրորդ փուլի առաջին խաղում «Արարատ-Արմենիան» հաղթեց «Շեմրոկ Ռովերսին
Չեմպիոնների լիգայի 2026/27 թթ. մրցաշրջանի որակավորման երկրորդ փուլի առաջին խաղում Հայաստանի գործող չեմպիոն «Արարատ-Արմենիան» Վազգեն Սարգսյանի անվան «Հանրապետական» մարզադաշտում երկու անպատասխան գնդակ ուղարկեց իռլանդական «Շեմրոկ Ռովերսի» դարպասը (2-0): Այս մասին տեղեկանում ենք armspot.am-ից։
Հանդիպման առաջին խաղակեսում դարպասի գրավում չարձանագրվեց։ Հայկական թիմը հաշիվը բացեց երկրորդ խաղակեսի մեկնարկում. 51-րդ րոպեին աչքի ընկավ Սանդրո Լիման:
Խաղի 72-րդ րոպեին Հայաստանի ազգային հավաքականի պաշտպան Կամո Հովհաննիսյանը վնասվածքի պատճառով պատգարակի օգնությամբ ստիպված եղավ լքել խաղադաշտը (նրան 75-րդ րոպեին փոխարինեց Լուիս Ֆելիպեն):
Արդեն հանդիպման վերջնամասում՝ 80-րդ րոպեին, փոխարինման դուրս եկած Զիդան Բանջակին կրկնապատկեց «Արարատ-Արմենիայի» առավելությունը՝ ձևակերպելով հանդիպման վերջնահաշիվը։
Հիշեցնենք, որ թիմերի միջև որակավորման երկրորդ փուլի պատասխան հանդիպումը կկայանա մեկ շաբաթ անց՝ հուլիսի 28-ին Իռլանդիայում:
