Պերուում գրանցված երկու երկրաշարժերն առնվազն վեց մարդու կյանք են խլել
Պերուում հուլիսի 18-ի երեկոյան տեղի ունեցած երկու երկրաշարժի հետևանքով առնվազն վեց մարդ է զոհվել, ևս 21-ը՝ վիրավորվել։ Ինչպես հաղորդում է Reuters-ը, այս մասին հայտնել է երկրի քաղաքացիական պաշտպանության ինստիտուտի ղեկավարը։
Պերուի Ազգային սեյսմոլոգիական կենտրոնի տվյալներով՝ 5,1 և 3,7 մագնիտուդով երկրաշարժերը տեղի են ունեցել Խունին շրջանի Չուպակա նահանգում, որը գտնվում է մայրաքաղաք Լիմայից մոտ 300 կիլոմետր դեպի արևելք։
Կենտրոնի տվյալներով՝ առաջին երկրաշարժի օջախը գտնվել է 24 կիլոմետր, իսկ երկրորդինը՝ 18 կիլոմետր խորության վրա։
Պերուի Ազգային քաղաքացիական պաշտպանության ինստիտուտի ղեկավար Լուիս Վասկեսը տեղական Exitosa ռադիոկայանին հայտնել է, որ նախնական տվյալներով՝ ամբողջությամբ ավերվել է շուրջ 48 տուն, ևս 18-ը վնասվել է։ Դրա հետևանքով տուժել է շուրջ 300 մարդ, որոնց ժամանակավոր կացարանով ապահովելու նպատակով վրաններ են տրամադրվել։
Կա մտավախություն, որ փլված կառույցների տակ շարունակում են մնալ մարդիկ։
