Կիմ Չեն Ընը գնահատել է ԿԺԴՀ-ի նոր «Կան Գոն» ականակրի մարտական պատրաստվածությունը
ԿԺԴՀ-ի առաջնորդ Կիմ Չեն Ընը անձամբ հետևել է նոր «Կան Գոն» ականակրի մարտական համակարգերի փորձարկումներին, որոնք տեղի են ունեցել հուլիսի 3-ին, հայտնում է Կորեայի կենտրոնական հեռագրական գործակալությունը (ԿԿՀԳ)։
Գործակալության տվյալներով, ստուգումների ընթացքում իրականացվել են ռազմավարական թևավոր հրթիռների արձակումներ, ինչպես նաև փորձարկվել են տախտակամածային հրետանային կայանքները, ավտոմատ թնդանոթներն ու ռադիոէլեկտրոնային պայքարի համակարգերը։ Միջոցառումների հիմնական նպատակը նավի տարբեր տեսակի սպառազինությունների արդյունավետության և կիրառելիության գնահատումն էր՝ մարտական պայմաններին հնարավորինս մոտ միջավայրում։
Փորձարկումների մեկնարկից առաջ Կիմ Չեն Ընը լսել է սպառազինության համակարգերի վերլուծությամբ զբաղվող մասնագիտացված խմբի զեկույցը՝ ականակրի մարտունակության ստուգման փուլային ծրագրի մասին։ Թեստերի ընթացքում գնահատվել են նաև նավի հնարավորությունները՝ թիրախների հայտնաբերման, տեղեկատվության մշակման և կրակի կառավարման ինտեգրված համակարգի աշխատանքի առումով։
Ինչպես նշվում է, Կիմ Չեն Ընը ընդգծել է, որ այս փուլը նավի հակառազմանավային, հակասուզանավային, հակաօդային և ռազմավարական հարվածային համալիրների հուսալիության առանցքային ստուգումն է։ Նա հայտարարել է, որ ընթացիկ մշակումները հաստատում են սեփական բարձր տեխնոլոգիական ռազմածովային համակարգերի ստեղծման ներուժը, որոնք կարող են էապես բարձրացնել երկրի զինված ուժերի մարտական պատրաստվածության մակարդակը։
Ստուգայցի արդյունքներով ԿԺԴՀ-ի առաջնորդը նշել է վերգետնյա և ստորջրյա մարտական հարթակների զարգացման, ինչպես նաև դրանք մարտական հերթապահության շրջաններում տեղակայելու հետագա խնդիրները՝ իշխող կուսակցության կողմից իրականացվող ազգային պաշտպանության ամրապնդման ռազմավարության շրջանակում։
Նա նաև կոչ է արել արագացնել ռազմածովային ուժերի ամրապնդման և ընդլայնման աշխատանքները, որոնք, նրա խոսքով, առանցքային դեր են խաղում երկրի ծովային ինքնիշխանության պաշտպանության գործում։
Առանձին ուշադրություն է դարձվել Կորեայի աշխատավորական կուսակցության կենտրոնական կոմիտեի պլենումի որոշումներին, որոնք վերաբերում են նավաշինական ճյուղի զարգացմանն ու նավաշինարանների արտադրական հզորությունների ավելացմանը։ Կիմ Չեն Ընը հանձնարարել է ավարտել «Կան Գոն» ականակրի փորձարկումները և այն առաջիկա երկու ամսվա ընթացքում ներառել ռազմածովային ուժերի կազմում։
