Նման հերթեր չեմ հիշում, բարձր մասնակցություն կա, քաղաքական ուժերին հաջողվել է ակտիվացնել ժողովրդին. Էդմոն Մարուքյանը քվեարկեց
Բոլոր տեղերում բարձր մասնակցություն է, նման հերթեր չեմ հիշում, քաղաքական ուժերին հաջողվել է ակտիվացնել ժողովրդին: Այս մասին լրագրողների հետ զրույցում ասել է Էդմոն Մարուքյանը:
«Մեր ուժի հետ կապված ակնկալիքս այն է, որ քաղաքական միտքը, բովանդակությունը այս գիշեր կվերադառնա Հայաստանի խորհրդարան: Ակնկալիքներս միայն մեր ուժի հետ չէ կապված, կապված է ՀՀ-ում ցնցումներից զերծ, հանգիստ, հանդարտ ու նորմալ կյանքի վերադարձի հետ:
Մենք արձանագրում ենք բարձր մասնակցություն, ասեմ, որ չեմ հիշում նման հերթեր: Բոլոր տեղերում բարձր մասնակցություն է, սա նշանակում է, որ քաղաքական ուժերին քարոզարշավով հաջողվել է ակտիվացնել ժողովրդին, մարդկանց բերել ընտրական տեղամաս»,- նշել է Մարուքյանը:
Անդրադառնալով ձերբակալություններին՝ Մարուքյանը շեշտեց, որ իրենց ուժից ձերբակալություններ չկան. «Ֆիզիկական շտաբները պրովոկացիայի բուն են, աշխատել ենք սոցիալական և էլեկտրոնային հարթակներում»:
