Իրանի զինված ուժերը կոչ են արել չանցնել Հորմուզի նեղուցով՝ առանց Թեհրանի թույլտվության
Իրանի զինված ուժերը շարունակում են վերահսկել Հորմուզի նեղուցը և բոլոր նավերին կոչ են անում ձեռնպահ մնալ դրանով անցնելուց՝ առանց Թեհրանի հետ համաձայնեցման։ «Արմենպրես»-ի փոխանցմամբ՝ այս մասին հայտարարել է Իրանի «Խաթամ ալ Անբիա» զորքերի Կենտրոնական շտաբի հրամանատար Ալի Աբդոլլահին։
«Մենք բոլոր ուժերով ապահովում ենք Հորմուզի նեղուցի անվտանգությունը և կառավարում ենք իրավիճակը։ Մենք բոլոր առևտրային նավերին և նավթատար լցանավերին կոչ ենք անում չձեռնարկել անցման որևէ գործողություն՝ առանց Հորմուզի նեղուցում տեղակայված զինված ուժերի հետ համակարգման, որպեսզի դրանց անվտանգությունը չհայտնվի սպառնալիքի տակ», – մեջբերել է նրա խոսքն Իրանի պետական հեռուստառադիոընկերությունը։
Աբդոլլահին նախազգուշացրել է, որ ցանկացած օտարերկրյա զինված ուժեր, հատկապես ԱՄՆ բանակը, կենթարկվեն հարձակման, եթե ցանկանան մոտենալ Հորմուզի նեղուցին կամ մտնել այնտեղ:
Ավելի վաղ ԱՄՆ նախագահ Դոնալդ Թրամփը հայտարարել էր Հորմուզի նեղուցում գործողություն մեկնարկելու մասին, որի շրջանակում ԱՄՆ-ի և Իրանի միջև հակամարտության պատճառով նեղուցում մնացած առևտրային նավերը պետք է ամերիկյան ուժերի ուղեկցությամբ դուրս բերվեն այնտեղից:
