Արգենտինան պաշտոնապես առաջադրել է Գրոսիի թեկնածությունը ՄԱԿ-ի գլխավոր քարտուղարի պաշտոնում
Արգենտինան պաշտոնապես առաջադրել է Ատոմային էներգիայի միջազգային գործակալության (ԱԷՄԳ) տնօրեն Ռաֆայել Գրոսիի թեկնածությունը ՄԱԿ-ի գլխավոր քարտուղարի պաշտոնում: Այս մասին հայտարարություն է տարածել երկրի արտաքին գործերի նախարարությունը։
«Արգենտինայի Հանրապետությունը պատիվ ունի ներկայացնելու ԱԷՄԳ-ի ներկայիս գլխավոր տնօրեն Ռաֆայել Գրոսիի թեկնածությունը ՄԱԿ-ի գլխավոր քարտուղարի պաշտոնում 2027-2031 թվականների համար», – ասվում է հայտարարության մեջ։
Արգենտինայի ԱԳՆ հայտարարության մեջ նշվել է, որ Գրոսին ի ցույց է դրել «հակամարտություններում և լուրջ միջազգային ճգնաժամերում դիվանագիտական երկխոսությունը խթանելու ունակություն», ինչը նրան դարձնում է ՄԱԿ-ի գլխավոր քարտուղարի պաշտոնում ծառայելու համար հարմար թեկնածու։
ՄԱԿ-ը պաշտոնապես հայտարարել է 10-րդ գլխավոր քարտուղարի ընտրության գործընթացի մեկնարկի մասին։ ՄԱԿ-ի գլխավոր քարտուղարի պաշտոնի թեկնածուն առաջադրվում է կազմակերպության անդամ պետությունների կողմից, ընդ որում՝ յուրաքանչյուր երկիր իրավունք ունի առաջարկել միայն մեկ թեկնածու:
Գլխավոր քարտուղարի ընտրության գործընթացը նախատեսված է 2026 թվականի հուլիսի վերջին։ Գրոսին ու ՄԱԿ-ի Առևտրի և զարգացման համաժողովի գլխավոր քարտուղար Ռեբեկա Գրինսպանը նախկինում հայտարարել էին համաշխարհային կազմակերպության ղեկավարի պաշտոնում առաջադրվելու իրենց մտադրության մասին։
Գլխավոր քարտուղարն ընտրվում է ՄԱԿ-ի Անվտանգության խորհրդի կողմից և հաստատվում Գլխավոր ասամբլեայի կողմից։ Նրանց պաշտոնավարման ժամկետը հինգ տարի է՝ վերընտրվելու հնարավորությամբ։ Ժամկետի սահմանափակում չկա, բայց ոչ ոք նախկինում այդ պաշտոնը չի զբաղեցրել ավելի քան 10 տարի։
Համաձայն հաստատված պրակտիկայի՝ ՄԱԿ-ի գլխավոր քարտուղար չի ընտրվում Անվտանգության խորհրդի մշտական անդամ երկրներից՝ Ռուսաստանից, Մեծ Բրիտանիայից, Չինաստանից, ԱՄՆ-ից և Ֆրանսիայից։ ՄԱԿ-ի ներկայիս գլխավոր քարտուղար Անտոնիո Գուտերեշի պաշտոնավարման ժամկետը լրանում է 2026 թվականի դեկտեմբերի 31-ին։
