Փաշինյանի կողմից եկեղեցու վրա հարձակումները ծառայում են հայերին բաժանելուն և ձեռնտու են Ադրբեջանին ու Թուրքիային․ The Christian Post
Այսօր Հայաստանը գտնվում է անկայուն մի հանգրվանում, որտեղ պայքարում է ներքին խորը պառակտումների դեմ, որոնք սպառնում են նրա ազգային անվտանգությանը և գոյությանը. գրում է The Christian Post-ը։
Մինչ հարևան Ադրբեջանից և Թուրքիայից արտաքին սպառնալիքները միշտ առկա են, Նիկոլ Փաշինյանի գլխավորած կառավարությունը լայնորեն քննադատության է ենթարկվել ներքին բևեռացումը սրող քաղաքականության և հռետորաբանության համար՝ քաղաքական անհամաձայնությունները վերածելով գոյաբանական հակամարտությունների։
Սա ոչ մի տեղ այնքան ակնհայտ չէ, որքան Փաշինյանի կողմից Հայ առաքելական եկեղեցու նկատմամբ իրականացվող հալածանքների ժամանակ՝ հայ քահանաների և հոգևորականության դեմ հանրային սպառնալիքների և հարձակումների արշավի միջոցով։ Այս վերջին զարգացումները բանավեճեր և մտահոգություններ են առաջացրել տարբեր խմբերի շրջանում՝ թե՛ երկրի ներսում, թե՛ դրսում։ Մինչ Հայաստանի կառավարությունը հայտարարել է, որ իր գործողությունները նպատակ ունեն ապահովել աշխարհիկությունը և պայքարել կոռուպցիայի դեմ, շատ հայեր այս գործողությունները համարում են քաղաքական դրդապատճառներով հարձակումներ, որոնք ազդում են կրոնական ազատության և ազգային կայունության վրա։
Ավելին, այս հարձակումները միայն ծառայում են հայերին բաժանելուն և ուղղակիորեն բխում են թուրքական և ադրբեջանական խաղացանկից, որտեղ պետական պաշտոնյաները շահագործում և խորացնում են ներքին հասարակական պառակտումներն՝ իշխանությունը պահպանելու համար։
Թեպետ Հայ եկեղեցին, անշուշտ, ունի իր թերությունները, ինչպես ցանկացած այլ խոշոր և ազդեցիկ կրոնական հաստատություն, կառավարության գործողությունները պարզապես հակասահմանադրական հարձակում են կրոնական ազատության և ազգային ինքնության վրա։
«Հայոց եկեղեցին հսկայական մշակութային և սոցիալական նշանակություն ունի Հայաստանում։ Այն խորապես կապված է ազգային ժառանգության, հոգևոր շարունակականության և հայոց լեզվի ու պատմության պահպանման հետ։ Դրա վրա հարձակումը ձեռնտու է Թուրքիային և Ադրբեջանին, որոնք ամենից շատ ցանկանում են տեսնել բաժանված և թուլացած Հայաստան։ Առանց Հայ եկեղեցու Հայաստան չի կարող լինել։ Որքան շուտ Հայաստանի կառավարությունը գիտակցի դա, այնքան լավ կլինի ազգի համար»,- գրում է աղբյուրը։
