Իսրայելի հարձակումից Լիբանանում մեկ քաղաքացի է զոհվել
Լիբանանի առողջապահության նախարարությունը հայտնել է, որ իսրայելական ուժերի կողմից Լիբանանի Սուր (Տիր) շրջանի Մանսուրի գյուղում մեքենայի թիրախավորման հետևանքով մեկ քաղաքացի է զոհվել։
Այս մասին հայտնում է Լիբանանի ազգային լրատվական գործակալությունը (NNA):Իսրայելական անօդաչու թռչող սարքը երկու հրթիռով թիրախավորել է մեքենան՝ ամբողջությամբ ոչնչացնելով այն։
Al Mayadeen հեռուստաալիքի փոխանցմամբ՝ զոհվել է Մանսուրիի դպրոցի տնօրեն Մոհամմադ Շուեյխը։
Իսրայելի պաշտպանության ուժերը հայտարարել են, որ Լիբանանի հարավում իսրայելական անօդաչուի հարվածի հետևանքով սպանվածը եղել է «Հեզբոլլահ» շարժման անդամ։
Լիբանանի առողջապահության նախարարության տվյալներով՝ չնայած «Հեզբոլլահ»-ի և Իսրայելի միջև 2024 թ. նոյեմբերի 27-ին կնքված հրադադարի համաձայնագրին՝ այդ օրվանից մինչև 2025 թվականի նոյեմբերի 3-ն ընկած ժամանակահատվածում Լիբանանում Իսրայելի կողմից օդային, ցամաքային և ծովային խախտումների ընդհանուր թիվը կազմել է 5163։ Հարձակումների հետևանքով զոհվել է 309 և վիրվավորվել 598 Լիբանանի քաղաքացի։
Հակառակ հրադադարի համաձայնագրին՝ իսրայելական բանակը մասամբ է դուրս եկել հարավային Լիբանանից՝ շարունակելով իր ենթակայության տակ պահել վերջին պատերազմի ժամանակ գրաված լիբանանյան հինգ կարևոր բլուրները։
