«Հաջողություն, Մարկո: Մենք գիտենք՝ ում մեղադրել, եթե ինչ-որ բան այնպես չընթանա». Թրամփը
Միացյալ Նահանգների նախագահ Դոնալդ Թրամփը հայտարարել է, որ ԱՄՆ-ն սկսել է քայլեր ձեռնարկել Պանամայի ջրանցքի նկատմամբ վերահսկողությունը վերադարձնելու ուղղությամբ։ Այս մասին նա ասել է Կոնգրեսի երկու պալատների առջև ունեցած ելույթում:
«Իմ վարչակազմը կվերադարձնի Պանամայի ջրանցքը, և մենք արդեն սկսել ենք դա անել… Հենց այսօր մի խոշոր ընկերություն հայտարարել է, որ գնում է Պանամայի ջրանցքի մերձակայքում գտնվող երկու նավահանգիստներ»,- ասել է Թրամփը:
Նա ընդգծել է, որ ԱՄՆ-ն ունի պետքարտուղար Մարկո Ռուբիո, որը «դրա պատասխանատուն է»։
«Հաջողություն, Մարկո: Մենք գիտենք՝ ում մեղադրել, եթե ինչ-որ բան այնպես չընթանա»,- կատակել է Թրամփը։Հոնկոնգում տեղակայված CK Hutchinson ներդրող և նավահանգստային օպերատոր հոլդինգն այս շաբաթ հայտարարել է, որ վաճառում է վերահսկողությունը ջրանցքի երկու նավահանգիստները կառավարող ընկերության նկատմամբ:
Թրամփն ԱՄՆ նախագահի պաշտոնն ստանձնելու օրը հայտարարել է, որ Պանամայի իշխանությունները չեն կատարում իրենց պարտականությունները Պանամայի ջրանցքի կառավարման հարցում, և որ Միացյալ Նահանգները կվերականգնի դրա նկատմամբ վերահսկողությունը։
Թրամփը հայտարարել է, թե «ջրանցքը կառավարում է Չինաստանը», ինչը հերքել են թե՛ Պեկինը, թե՛ Պանաման։
Ամփոփելով պետքարտուղար Ռուբիոյի Պանամա կատարած այցը՝ Թրամփն ավելի վաղ հայտարարել էր, որ կկարողանա արագորեն լուծել Պանամայի ջրանցքում չինական ընկերությունների ներկայության հետ կապված խնդիրը։
