Թրամփը հայտարարել է, որ մոտ 25% մաքսատուրքեր կսահմանի ավտոմեքենաների, դեղագործական ապրանքների և չիպերի համար
ԱՄՆ նախագահ Դոնալդ Թրամփը Ֆլորիդայի նահանգի Մար-ա-Լագոյի իր կալվածքում լրագրողների հետ զրույցում հայտնել է, որ մտադիր է մոտ 25%-ի չափով մաքսատուրքեր սահմանել ավտոմեքենաների, ինչպես նաև 25% կամ ավելի բարձր մաքսատուրքեր` կիսահաղորդիչների և դեղագործական ապրանքների ներմուծման համար։ Այդ մաքսատուրքերը զգալիորեն կաճեն մեկ տարվա ընթացքում:
Այս մասին հայտնում է Reuters-ը։
ԱՄՆ նախագահը նշել է, որ ավտոմոբիլների համար գանձումները, հնարավոր է, սկսվեն հենց ապրիլի 2-ին. ապրիլի 1-ին նրա աշխատակազմի անդամները զեկույցներ են ներկայացնելու՝ նախանշելով ներմուծման մաքսատուրքերի մի շարք տարբերակներ։
Reuters-ը նշում է, որ Թրամփը ձգտում է վերափոխել համաշխարհային առևտուրը: Նա երկար ժամանակ քննադատում էր արտաքին շուկաներում ամերիկյան ավտոմեքենաների արտահանման նկատմամբ անարդար վերաբերմունքը։
Եվրամիությունը տրանսպորտային միջոցների ներմուծման համար գանձում է 10% մաքսատուրք, ինչը չորս անգամ գերազանցում է ԱՄՆ-ի կողմից մարդատար ավտոմեքենաների համար սահմանված 2,5% դրույքաչափը:
Ի տարբերություն դրա, սակայն, պիկապ մեքենաների համար ԱՄՆ-ն գանձում է 25% մաքսատուրք բոլոր երկրներից, բացի Մեքսիկայից և Կանադայից։
Ավելի վաղ ԱՄՆ նախագահ Դոնալդ Թրամփը հրամանագիր էր ստորագրել երկիր ներմուծվող ամբողջ պողպատի և ալյումինի համար լրացուցիչ 25% մաքսատուրք սահմանելու մասին:
Դրանք պետք է ուժի մեջ մտնեն մարտի 12-ին և կտարածվեն բոլորի վրա, այդ թվում՝ Կանադայի, Մեքսիկայի, ԵՄ-ի և այլ առևտրային գործընկերների։
