Մենք պետք է հրաժարվենք շրջանառության հարկից. Նիկոլ Փաշինյան
Նիկոլ Փաշինյանն այսօր խորհրդարանում Ազգային ժողով-Կառավարություն հարցուպատասխանի ժամանակ անդրադարձավ շրջանառության հարկի բարձրացմանը և դրան հաջորդած դժգոհություններին:
Փաշինյանն ասաց, թե ըստ վիճակագրության՝ շրջանառության հարկ վճարողների 61.7 տոկոսը ցույց է տալիս մինչև 10 միլիոնի շրջանառություն, այսինքն՝ ստացվում է, որ օրը 27.000 դրամի առևտուր են անում: Նշելով, որ ինքը տնտեսագետ չէ, Փաշինյանն ասաց, որ երբ գործընկերներով հաշվարկում են, ստացվում է՝ այդ բիզնեսները տնտեսագիտական հաշվարկով իրականում պետք է գոյություն չունենային։
«Ինչքանո՞վ է սա ճիշտ… 1, 2, 3, 4, 5 տարի խնդրում ենք, ասում ենք՝ ժողովո՛ւրդ ջան, մենք հեղափոխություն ենք արել, որ նաև բոլորս մեր հարկային պարտավորություններն իրականացնենք»,- ասաց Նիկոլ Փաշինյանը։
Նա նշեց, որ ամեն դեպքում եթե տեսնեն, որ իրենց հաշվարկները սխալ են, չեն զլանա իրենց սխալն ընդունել։
Ինչ վերաբերում է դժգոհությանը, որ մեծ բիզնեսները փաստաթուղթ չեն տրամադրում, Փաշինյանն ասաց, որ իրենք ուզում են նաև իմանալ, թե ովքեր են այդ փաստաթուղթ չտրամադրողները։
«Մենք պատրաստ ենք գնալ բոլոր փաստաթուղթ չտվողների հետևից», – հայտարարեց նա:
