Եգիպտոսն ու Թուրքիան դարձյալ դեմ են արտահայտվել պաղեստինցիների տեղահանմանը
Թուրքիայի արտգործնախարար Հաքան Ֆիդանը և Եգիպտոսի նրա պաշտոնակից Բադր Աբդ ալ-Աաթին Անկարայում հանդիպման ժամանակ վերահաստատել են իրենց անհամաձայնությունը պաղեստինցիների տեղահանման վերաբերյալ՝ անդրադառնալով ԱՄՆ նախագահ Դոնալդ Թրամփի՝ Գազայի բնակիչներին Եգիպտոս և Հորդանան տեղափոխելու կոչին: Այս մասին հայտնում է Al Jazeera լրատվական գործակալությունը։
Կողմերը համատեղ հայտարարության մեջ ընդգծել են, որ մերժում են իրենց հողերից պաղեստինցիների բռնի տեղահանումը կամ նրանց տեղափոխումն այլ երկրներ ցանկացած կարճաժամկետ կամ երկարաժամկետ նպատակներով:Երկու երկրների պաշտոնյաներն իրենց վճռական աջակցությունն են հայտնել Պաղեստինի ժողովրդի հաստատակամությանը և իր հողին ու օրինական իրավունքներին հավատարիմ մնալուն։
Հայտարարության մեջ նշվում է, որ այս քայլերը սպառնում են տարածաշրջանի կայունությանը և նպաստում հակամարտության շրջանակի ընդլայնմանը՝ խաթարելով ժողովուրդների միջև խաղաղության և համակեցության հասնելու հնարավորությունները։
2025 թ․ հունվարի 26-ին ԱՄՆ նախագահ Դոնալդ Թրամփը կոչ էր արել «մաքրել» ավերված Գազայի հատվածը՝ հորդորելով բնակիչներին տեղափոխել Եգիպտոս և Հորդանան՝ տարածաշրջանում խաղաղություն հաստատելու նպատակով։
Իսկ փետրվարի 4-ին Իսրայելի վարչապետ Բենիամին Նեթանյահուի հետ հանդիպումից հետո կայացած մամուլի ասուլիսում Թրամփը հայտարարել է, որ Վաշինգտոնն իր ձեռքը կվերցնի Գազայի հատվածը, հնարավոր է նաև՝ ամերիկյան զորքերի օգնությամբ, այն կվերածի մերձավորարևելյան Ռիվիերայի, իսկ այնտեղ ապրող պաղեստինցիները պետք է հեռանան։
