Պետության 1-ին դեմքի շարասյան մեջ բժիշկ է լինում. չեն կանգնել, որ հղի կնոջը օգնեն. Ռոբերտ Քոչարյան
Հայաստանի դատական համակարգն աշխատում է ի շահ իշխանության և ընտրովի մոտեցում է ցուցաբերում արդարադատության նկատմամբ: Լրագրողների հետ զրույցում այս տեսակետը հայտնեց ՀՀ 2-րդ նախագահ Ռոբերտ Քոչարյանը:
Նա զուգահեռներ անցկացրեց երկու աղմկահարույց գործերի՝ Պողոս Պողոսյանի և հղի Սոնա Մնացականյանի մահվան միջև։
Նա նշեց, որ այս գործերն ունեն ընդհանրություն` երկու դեպքում էլ հանցագործությունների մեղավորները եղել են երկրի բարձրաստիճան պաշտոնյաների շրջապատի անձինք, սակայն դատական համակարգի արձագանքը երկակի ստանդարտներ է ցույց տալիս։
«Երբ իմ թիկնապահին մեղադրանք առաջադրվեց, ես ոչ մեկին չզանգեցի, չգրեցի կամ խնդրանքներ չփոխանցեցի։ Նա անմիջապես հեռացվեց աշխատանքից, և դատական գործընթաց սկսվեց։ Բայց տեսեք, թե ինչ է կատարվում հիմա: Ո՞վ է պատասխանատվություն կրել վարչապետի ավտոշարասյան կողմից վրաերթի ենթարկված հղի կնոջ մահվան համար։ Ոչ ոք։ Մեղավորին նույնիսկ աշխատանքից չեն հեռացրել։ Ավելին` ես վստահ եմ, որ նա նաև պարգևավճար է ստացել», – հայտարարեց Քոչարյանը։
Նա նաև մատնանշեց ավտոշարասյան մասնակիցների պահվածքը, որոնք, ըստ նրա, նույնիսկ չեն փորձել օգնություն ցուցաբերել տուժածին:
«Նրանք կանգ չեն առել, բժիշկ չեն կանչել, նրան հիվանդանոց չեն տարել։ Դատական համակարգը քողարկում է նրանց գործողությունները», – հավելեց նա՝ նշելով, որ պետության 1-ին դեմքի շարասյան մեջ բժիշկ է լինում, բայց չեն կանգնել, որ հղի կնոջը օգնեն։
«Դատական համակարգն իր ներկայիս տեսքով աշխատում է բացառապես իշխանության ղեկին գտնվողների շահերի համար։ Դա խախտում է արդարության և օրենքի առջև հավասարության սկզբունքները»,- եզրափակեց Քոչարյանը։
