Yandex GO-ին պատկանող ընկերությունը Վրաստանից անձնական տվյալները փոխանցել է ՌԴ-ին
Անձնական տվյալների պաշտպանության ծառայությունը տեղեկացրել է, որ ստուգման շրջանակներում ուսումնասիրել է «Ռայդտեղ Ջորջիա» ՍՊԸ-ի կողմից անձնական տվյալների հնարավոր ապօրինի փոխանցման փաստն այլ պետության։ Այս մասին գրում է aliq.ge-ն։
Ընկերությունը տաքսի ծառայություններ է առաջարկել Վրաստանի օգտատերերին Yandex GO (ուղևորների համար) և Yandex Pro (վարորդների համար) հավելվածների միջոցով։
Անձնական տվյալների պաշտպանության ծառայությունը նշել է՝ ստուգման ընթացքում պարզվել է, որ հավելվածը միացել է Ռուսաստանի Դաշնությունում տեղակայված սերվերներին ինտերնետ կապի մոնիտորինգի ընթացքում։ Ըստ այդմ՝ բացահայտվել է IP հասցեները Ռուսաստանի Դաշնությանը փոխանցելու փաստը։
Անձնական տվյալների պաշտպանության ծառայությունը նշել է նաև, որ մինչ ստուգումը «Ռայդտեղ Ջորջիա» ՍՊԸ-ն դիմել է ծառայությանը և թույլտվություն խնդրել Վրաստանի տարածքում մշակված անձնական տվյալները Ռուսաստանի Դաշնությանը փոխանցելու համար։ Ծառայությունը չի բավարարել ընկերության խնդրանքը:
Անձնական տվյալների պաշտպանության ծառայության տվյալներով՝ պարզվել է, որ «Ռայդտեղ Ջորջիա» ՍՊԸ-ն խախտել է «Անձնական տվյալների պաշտպանության մասին» Վրաստանի օրենքի պահանջները գրանցված օգտատերերի՝ ուղևորների և վարորդների անձնական տվյալները Վրաստանի տարածքից Ռուսաստանին փոխանցելով։
Օրենքի խախտումը բացահայտելուց հետո «Ռայդտեղ Ջորջիա» ՍՊԸ-ն տուգանվել է. կարգադրվել է դադարեցնել օգտատերերի անձնական տվյալների փոխանցումը Ռուսաստանին։ Ընկերությանը 4000 լարի վարչական տուգանք է ներկայացվել:
