ՀՀ ԱԳՆ-ն ՀՀ քաղաքացիների շահերը պաշտպանելու փոխարեն, նրանց «բացատրում» է, որ՝ ԵՄ երկրները ճիշտ են, իսկ իրենք՝ սխալ. Հակոբ Բադալյան

Հակոբ Բադալյանը գրում է. «Հայաստանի ԱԳՆ բավականին երկար տեքստով մի պարզաբանում է տարածել ՀՀ քաղաքացիների համար, թե ինչու նրանց թույլ չեն տալիս մուտք գործել Շենգենյան համաձայնագրի մի երկիր, եթե վիզան ստացել են մեկ այլ երկրում:

Եթե «համառոտագրենք», ապա ասում են, որ՝ Եվրամիությունը ճիշտ է, դուք՝ սխալ:

Եվ սա այն դեպքում, երբ ՀՀ քաղաքացիները չեն անում որեւէ խախտում: Այսինքն որեւէ կերպ արգելված չէ ստանալ իքս երկրի վիզա՝ դիմելով տվյալ դեսպանատուն, բայց մեկ կամ երկու օր այնտեղ մնալուց հետո մեկնել շենգենյան գոտու մեկ ուրիշ երկիր:

Եթե Շենգենյան համաձայնագրի երկրները այդ համաձայնագրի կիրառումը իրականացնում են վերապահումներով, ապա հենց սկզբից թող հայտարարեն, որ՝ ՀՀ քաղաքացիներ, ձեզ համար Շենգեն համաձայնագրի էֆեկտը չի գործում եւ դուք պետք է ԵՄ ամեն մի առանձին վերցրած երկիր այցելելուց ունենաք հենց տվյալ երկրի մուտքի վիզա:

Թող հայտարարեն այդպես, այլ ոչ թե կամայական՝ ՀՀ մի քաղաքացի ազատ շրջի, մյուսին էլ հանկարծ թույլ չտան մի երկրի դեսպանատանը ստացած վիզայով մուտք գործել ԵՄ մեկ այլ երկիր:

Իսկ ինչու՞ են ՀՀ քաղաքացիները հաճախ դիմում վիզա ստանալու այդ տարբերակին: Որովհետեւ ՀՀ քաղաքացիներին Շենգենյան վիզա տրամադրելու հարցում իրավիճակը արձանագրել է հետընթաց, եւ դա ոչ թե իմ կարծիքն է, այլ ՀՀ փոխարտգործնախարարի գննահատականը, որը նա բարձրաձայնել է նախորդ տարի խորհրդարանում:

Այդ հետընթացի պայմաններում, ՀՀ քաղաքացին բնականաբար փորձում է գտնել իր համար առաջընթացի տարբերակներ, ընդ որում նկատենք՝ ամենեւին չանելով որեւէ անօրինական, ոչ իրավաչափ գործողություն:

Իսկ ՀՀ ԱԳՆ-ն այդ հարցում ՀՀ քաղաքացիների շահերը պաշտպանելու փոխարեն, նրանց «բացատրում» է, որ՝ ԵՄ երկրները ճիշտ են, իսկ իրենք՝ սխալ:

Եվ սա մի դեպքում, երբ շաբաթներ առաջ մի շռնդալից դիվանագիտական հաղթանակ ու ձեռքբերում էր ներկայացվում, որ ԵՄ անդամ երկրների դեսպանների մակարդակով հավանություն է տրվել Հայաստանի հետ առանց վիզային ռեժիմի շուրջ բանակցություն սկսելու ԵՄ առաջարկին:

Ինչպես նշել էի այն ժամանակ, հիմա էլ կրկնեմ՝ իրական, գործնական առաջընթացի մտադրության պարագայում, փոփոխությունը կլիներ այսպես ասած գետնի վրա՝ վիզաների տրամադրման ներկայիս գործընթացը բնականոն կազմակերպելու հարցում»։